09 Dec 2023: Manipur tualchhung buaina avanga harsatna tawk Zohnahthlak Relief Camp-a awm mekte tanpuina turin Central YMA chuan Buhfai Bag 100 leh thawmhnaw lum leh mutbu engemawzat chu tukin khan Aizawl atangin a thawn chhuak.
Heng tanpuina te hi Central YMA President Pu Lalhmachhuana chuan CYMA Office Tuikhuahtlang atangin a vailiam a, Central YMA President chuan thusawiin Zofate inpui leh an Jerusalem chu Mizoram a ni a, a chhunga cheng Mizoram mipui ten hmun hrang hrang a Zofate harsatna thil tawn chu an hre reng a, an theih ang angin an tuamhlawm zel dawn a ti bawk.
Myanmar, Manipur leh Bangladesh tualchhung buaina avanga Zohnahthlak harsatna tawk mekte tanpuina tur hian hmun hrang hrang atangin Central YMA ah tanpuina hi a lut thin a, tun thlenga Central YMA hnena tanpuina lut tawh hi Rs nuai 236 chuang ni tawhin, heng atang hian Rs nuai 167 chuang pekchhuah a ni tawh bawk. [DD Aizawl]
