11 Dec 2023: Vawiin khan Chief Minister Pu Lalduhoma chuan a department enkawl pahnih Finance Department hotute leh Planning & Programme Implementation department hotute chu a pisaah meeting a neihpui.
Meetingah hian Chief Minister duh danin November thla hlawh vawiin thlenga sawrkar hnathawkten an la lak loh chu pek chhuah nghal tura ruahman a ni a, Healthcare bill tang pek tur Rs vaibelchhe 40 leh Thlai thar leina, sawrkar policy-in a huam thlai palite leina tur Rs vaibelchhe 110 an ruahman nghal bawk. Kumtina Zirlai naupang scholarship pek chhuah hun tlai thin pawh hi kum thar atang chuan a hun taka pek chhuah theih dan dap turin a hrilh a ni.
Budget thar ruahman tan a hun tawh avangin Budget an buatsaihnaah sawrkar sum dinhmun dik tak, a nihna ang taka dah chhuak turin a chah bawk.
He hunah hian Finance Department hnathawh dan chipchiar taka sawifiahna Pu Vanlal Chhuanga, IA&AS, Principal Secretary chuan a nei a, Planning & Programme Implementation Department hmalak dante hi Pu Lalmalsawma Pachuau, IRS, Secretary in sawifiahna a nei a ni.
Chief Minister hi Dr. Renu Sharma, IAS, Chief Secretary leh Pu K.Lalthawmmawia, Commissioner & Secretary to Chief Minister ten an tawiawm a ni. (DIPR)
