14 May 2025: Vawiin khan Chief Minister Pu Lalduhoma chuan Sairang Horticulture Centre-ah National Bamboo Missions Fund Rs. Nuai 252.826 senga din Bamboo Treatment & Seasoning Plant, Bamboo Depot & Godown leh Activated Charcoal Unit (Meihawl siamna) te a hawng. Pu C.Lalsawivunga, Horticulture Minister chu khualzahawm a ni a, Prof Lalnilawma, Minister, RD leh Pu H.Ginzalal, Technical Adviser to CM ten an telpui.
Chief Minister chuan, National Bamboo Mission hmalakna hmanga Mau sawngbawlna thar kan nei ta hi a lawmawm kan ti a, Mau hi kan ramin resource kan neih that a ni a, tunlai mila kan hman thiam zel hian kan economy tithatu, eizawnna tam tak min siamsaktu a ni thei a, a treatment plant atanga sawngbawl tawh te hi kum 50 thleng hman theih tura ngaih a ni a, Mau hmanga thil siam thin te tan a hlu hle ang, a ti.
Pu C.Lalsawivunga pawhin thusawiin, mau sawngbawlna kawngah Mizoram chuan hmasawnna thar kan han nei a, kan lawmin kan phur hle mai. Kan mau neih te hi tangkai taka hman tumin kan bei zel dawn a ni, a ti.
Pu C. H Lalmuanpuia, Director, Horticulture, Missions Director, State Bamboo Missions chuan technical report a pe a. Mau treatment & Seasoning Plant hi nget thei tawh lo tura mau sawngbawlna a ni a, sawngbawl tawh chu kum 50 thleng a hman theih dawn ni a sawi a ni.
Depot leh Godown hi a dah khawmna a ni a. Activated Charcoal Unit atang hian ni khatah meihawl ton 3 a siam theih a, kum khatah ton 900 siam chhuak thei tura beisei a ni. Nitin mau pum 670 vel a mamawh a, meihawl a siam rualin nitin vinegar litre 100 vel a siam chhuak ve nghal zel ang. Hman tlaka distilled hnuah phei chuan nitin vinegar fir tha 54 Litre vel a chhuak thei dawn a ni.
This website uses cookies to improve your web experience.