CM-in Village Council term kal mek hi Covid 19 avang khan pawhsei a ni tawh, a ti
28th Nov 2024: Pu Lalduhoma Chief Minister Lawngtlai tlawh tura kal chuan vawiin chawhma dar 11:30 khan ZPM Southern Hqrs Office, Lunglei a tlawh a. He hunah hian Chief Minister chuan, Village Council inthlan chungchangah, kum thar 2025 February thla chawhnu lamah chuan inthlanna neih tura ruahman mek a nih thu sawiin, he ruahmanna an kalpui chhan chu Village Council term kal mek hi Covid avang khan pawhsei a ni tawh a, a tul hunah Sorkar chuan a pawt sei theiin a pawt tawi thei, hei hi Sorkar thuneihna a ni a, tunhma pawhin pawh sei leh pawh tawite alo awm tawh thin a, thuneitute thuneihna a ni, a ti.
February thlaah Session kan nei ta ziah a, Planning Commission kan neih tak loh hnu hian Session hi kan nei hma ta a, Parliament pawhin Session hi an nei hma tlangpui ta a, chuvang chuan a tlai berah February thla tawp lama Session hi kan tan loh chuan kan tlai ang tih kan hlauva, chungte ngaihtuah chuan Budget Session hma a lo inthlan fel kha a pawimawh a ni, a ti bawk.
Village Council kan han inthlang ang a, Financial Year thar April thla atangin hna an thawk thei tawh dawn Chief Minister chuan tiin, chutianga hunbi pawimawh bik anih avang chuan Financial Year thar kha a hlui ten an kai khan thil buaithlak a awm theih thin avangin hetiang ruahmanna hi siam a ni a, Village Council thar-ah chuan kalphung thara kal turin kan duh dawn a ni, a ti bawk.
Chief Minister Pu Lalduhoma chuan Hand-Holding chungchangah Loan lak chi leh Chief Minister’s Special Pakage (a thlawn a Rs nuai 1 thleng lak theihna) a awm tih sawiin, November thla thleng dilna hun hawn a nih thu leh heng diltute hian tunah hian an hmuhloh pawhin an dilna hi an ring zel thei dawn a ti a. Tun December thla chhung hian CM’s Special Package bik hi Selection neih tum a ni a, tun financial Year chhung ami tur hi chu a Pilot Project anga kalpui a nih thu leh nakum leh a kum lehah tam leh zuala kalpui chhoh zel tum a ni, a ti.
Vawiin inkhawm hi Pu C.Lalhmingliana, President ZPM Southern Hqrs chuan kaihruaiin Elected OB, GS bakah LMC Councillor-te’n an tawiawm a ni.
