Damdawi ei turah fimkhur turin chah

Food & Drugs Administration Wing (FDA), Health Department chuan Mizoram chhunga damdawi quality endik kawnga hma an lakdan an tarlang.

Damdawi quality endik chungchanga mawhphurtu chu Food & Drugs Administration Wing (FDA), Health Department hi a ni a. Anni hian sawrkar-in supplier-te hnen atanga a lei damdawite leh mimal pharmacy-a zawrhlai damdawi sample-te lain, laboratory-ah an thawn thin a, Mizoramah damdawi quality test-na kan la neih loh avangin Regional Drug Testing Laboratory (RDTL), Guwahati-ah thawn thin a ni, a ti.

Kum 2024 October thla atangin Internal Performance Agreement – Mizoram Health Systems Strengthening Project (IPA-MHSSP) hnuaiah Damdawi Quality Endik hi rin luh a lo ni ve ta a. Damdawi test-na senso tur sum a awm chinah FDA chuan hma a la chho ta a, damdawi quality test zat nasa takin a pung ta a, a thlamuan thlak hle tiin a tarlang.

IPA-MHSSP hnuaia hmalak anih hnua damdawi sample test dan dinhmun chu hetiang hi a ni – kum 2022-23 chhungin sample 106 test a ni a, kum 2023-24 chhungin 121, IPA-MHSSP(Oct.’24- Sept.,’25) ah chuan damdawi 800 zet test a ni ta, a ti.

IPA-MHSSP hnuaia hmalak hnu (Oct.,’24 to Sept.,’25) chhunga damdawi test result dinhmun chu hetiang hi a ni :-

Damdawi man tlawm test zat – 100

Quality tha lo (Not of Standard Quality) – 2 (2% )

Damdawi pangngai test zat – 700

Quality tha lo (Not of Standard Quality) – 21 (3%)

Damdawi sample 800 zet quality endikah hian a lem (spurious) hmuh a ni lo va. Not of Standard Quality tia laboratory-in result a pekte hi Drugs & Cosmetics Act, 1940 and Rules, 1945-in damdawi mal te te standards atana a bituk tling zo lo an ni a, ei atana tlak loh tihna a ni, a ti.

Hetiang hi kan dinhmun anih avang leh ramchhung state thenkhata damdawi thalo avanga harsatna an tawh mek ang hi kan State a thleng ve thei anih avangin hriselna lama thawktute leh a hmangtu mipuite pawhin kan damdawi ei turah kan fimkhur lehzual a pawimawh hle awm e, tiin an tarlang a ni.