22 Oct 2025: Tukin khan Aizawl-a Vanapa Hall kawtah Mizoram Legislative Assembly Speaker Pu Lalbiakzaman nikuma Cyclone Remal-in a tihchhiat District hrang hranga School-te tana sem tur tuizem a vailiam.
School Education Department buatsaih tuizem sem chhuah puala Vanapa Hall kawta inkhawm tawite neihah Speaker chuan cyclone Remal-in a tihchhiat hmun hla tak taka awm School-te’n tui dahkhawlna tur tuizem an dawng tur chu lawmawm a tih thu sawiin; tuizem phur motor 10 a vailiam a ni.
School Education Director Pi Angela Zothanpuii chuan Cyclone Remal tuartu tui dahkhawlna nei lo School-te tana tuizem semchhuah chu SASCI sum atanga lei anih thu a sawi a. GEM kaltlangin Finance Department-in procurement tih dan tur a sawi ang thlapa lei a ni tih a sawi.
Tuizem sem chhuah hi District hrang hrangah thawn chhuah a ni a, Mamit District-ah erawh chuan inthlan a nih dawn avangin inthlan zawhah sem a ni dawn a ni.
District hrang hrang tana sem chhuah tur zat chu Aizawl District tan -16, Lunglei-39, Siaha – 12, Champhai-2, Kolasib -59, Serchhip -1, Mamit -19, Saitual-1 leh Hnahthial – 3 a ni. (DIPR)
