HIV/AIDS hrik pai hmuh chhuah thar mi 105 an awm

29 April 2026: Vawiin chawhma khan Lunglei District AIDS Prevention & Control Committee (DAPCC) chu Additional Deputy Commissioner Pi Rochuangkimi Khenglawt kaihhruaiin Lunglei DC Conference Hall-ah an ṭhu khawm a. Mission AIDS Suraksha chungchang inhrilh hriatna hun hman niin, Lunglei District dinhmun (Profile) thlirho a ni a, District Action Plan hnuaia kumin chhunga hmalak dan tur sawiho a ni bawk.

DISHA CPM report aṭanga a lan danin, April 2025 aṭanga March 2026 chhungin Lunglei District-ah HIV/AIDS hrik pai hmuh chhuah thar mi 105 awmin, chu’ng zinga 67 chu mipa leh 38 chu hmeichhia an ni a; hmeichhia HIV/AIDS kai zingah hian nau pai lai 6 an tel. HIV kai thar zingah hian mipat hmeichhiatna aṭanga kai 66.67% awmin, inchiuna hriau thianghlim lo aṭanga kai 31.31% leh nu HIV kai aṭanga fate kai chhawng (vertical transmission) 2.02% an awm bawk a. HIV/AIDS kai thar zinga 84.85% lai chu kum 15 leh kum 49 inkar an ni.

He hunah hian MAS atana District Action Plan tur ruahmanna sawi ho niin, Lunglei District-a HIV/AIDS darh zel tur ven nan mahni dinhmun inhriat chian a pawimawhzia leh hemi atan hian HIV/AIDS leh Syphilis endik (test) uar a ṭul thu ngaihthlak a ni a. Kumin chhungin Red Ribbon Club awmna college pasarihah HIV/AIDS chungchang inzirtirna leh endikna (Awareness Campaign & Screening) buatsaih ni se tih niin, sawrkar pisa a tam thei ang berah HIV test kalpui ni se tih a ni.

Kumin May thlaa Healthy Lunglei District Campaign hnuaia hmalakna kalpui turah HIV endik tel ve ni se tih niin, tlawmngai pawl (NGO) hrang hrang leh kohhrante nena thawhho dan tur rel a ni bawk. (DIPR)