14 May 2024: Vawiin chhun dar 12:00 khan Mizoram Board of School Education (MBSE) chuan High School Leaving Certificate (HSLC) exam result a tichhuak a, a pumpuiah Lalmoipuia Lawmzual, St. Paul’s Higher Secondary School chu pakhatna a ni a, exam beitu 73.37% an pass a ni.
HSLC exam result chhuakah hian pahnihna chu Vanlalmuanpuii, St. Paul’s Higher Secondary School niin pathumna chu H. Lalsangpuia, St. Joseph Higher Secondary School a ni.
Kuminah hian exam beitu hi zirlai 18,561 niin zirlai 13,618 in an pass-a. HSLC pass tharte hi Distinction-a pass mi 1,332, I Division-a pass mi 3,801, II Division-a pass mi 5,564 leh III Division-a pass 2,921 an ni a, II Division-a pass an tam ber a, I Division-a pass in an dawt a ni.
HSLC pass thar te hi hmeichhia 7181 niin mipa 6437 an ni a. Kumin HSLC exam-ah hian zirlai 4,837 in hlawhtlinna an chang thei ta lo a, compartmental chance pek zirlai 106 an awm bawk a ni.
Result tihchhuah a nih veleh hian MBSE Chairman Pu JH Zoremthanga chuan MBSE pisaah chanchinbumite kawmin Pathian hruainaa HSLC result an tichhuak leh chu lawmawm a tih thu a sawi a. Tluang taka an ruahman anga result an tichhuak thei chu High School zirtirtute inpekna leh thahnemngaihna vang te, Educational department pumpui tanrualna avang leh MBSE thawktute thawhrimna rah bakah an thawhpui department hrang hrangte inpekna vang a ni a ti a. Kumina compartment 106 awm te chu admission an tlai loh nan exam buatsaih thuai a nih tur thu a sawi a ni.
Kuminah hian nikum aiin za zela zirlai pass zat an tam thu sawiin MBSE Chairman chuan nikumah 71.14% a nih laiin kuminah chuan 73.37% a nih thu a sawi a. Kumin exam-ah hian zawhna har zawng tehnaa a zangkhai deuh, LOTS zawhna 60% leh a bak zawng 40% chu tlema har deuh Application leh HOTS atanga siam anih thu a sawi a, zirnain hma a sawn zel nan HOTS zawhna chu telh tam deuh deuh tura ruahman a nih thu a sawi a ni. (AIR)
