India rama Paraglider naupang ber record siamtu Samuel Lalbiakhlua lawmpuina hun hmang
16 May 2024: Vawiin khan India rama Paraglider naupangber record siamtu Samuel Lalbiakhlua s/o Pu MS Dawngzuala, Saitual Venglai chu Saitual DC Conference Room ah Saitual Bawrhsap Dr Lalngura Tlau kaihhruaina hnuaiah Saitual District Sports Committee chuan lawmpuina hun hmanpuiin lawmpuina pawisa fai Rs 10,000 an hlan.
Bawrhsap chuan Samuela chu hetiang dinhmun thleng thei a tumruhna leh huaisenna a nei chu fakawm a tih thu leh Saitual district chhungah khawvel huap pawha lang thei hetianga chawimawi tur an awm chu lawmawm a tih thu sawiin, India rama paraglider naupang ber record a siam thei chu a chhuang takzet a ni a ti a, Association leh afiliated chauh pek tura sport committee ten an lo rel tawh mah ni se Samuela Lalbiakhlua hlawhtlinna chu District sport commitee ten hmaih chi ah an ngaihloh avanga hetianga ti hi an ni, a ti.
Saitual District Sports Committee Vice-chairman Pu Lalbiakvela pawhin Samuela chungchang sawiin Adventure sports chu an affiliated member ah tello mahse, hetianga hlawhtlinna chang an nei chu lawmawm a tih thu leh district sports committee ten an chhuang takzet tih a sawi a. A nu leh pa te pawhin Samuela ang fa an nei thei chu vanneihthlak a tih thu a sawi bawk.
Chhungkaw aiawhin Samuela pu, Pu Lalrosiama pawhin thu sawiin a tupa hlawhtlinna chungchangah hmalakna a awm chu a beisei phak loh thu leh lawmawm a tih thu sawiin Saitual Bawrhsap hova lawmpuina hun an siam thei chu a lawmthu a sawi bawk.
