30 November 2023: India rama Water Heritage 75 thlan zinga tel Saptui Water Point Serkawnah tukin dar 7:00 khan Water Heritage Fortnight kharna inkhawm Serkawn Local Council buatsaihin hman a ni a, Lunglei DC Pi Ramdinliani IAS-in khuallian niin a hmanpui.
Lunglei DC chuan, Saptui Water Point India rampum huapa Tuikhur tha 75 zinga thlan a ni hi a chhuanawm hle tih sawiin, hetiang anih theihna tura Lunglei D.C kalta Pu Kulothungan leh a thawhpuite hmalakna a fakawm hle a ni, a ti. Saptui Water Point anga tuikhur tha tuihna kang ngailo nei turin kan ramah tuihna siam turin ramngaw siam uar ila, kan tu leh fate lo awm zel tur ngaihtuahin kan tuihna vawng tha ang u, a ti.
Er.K.Zohmingliana S.E, PHE, Lunglei Circle chuan report tawi pein, India ram zalenna kum 75-na lawmna Azadi Ka Amrit Mahatsov (AKAM) pualin Ministry of Water Resources, department of Jal Shakti chuan Water Heritage Structure a thlanga, State tin atangin 400 chuang thehluh niin; 75 an thlan zingah Serkawna Saptui Water Point chu a tel a ni a ti a. Tun dinhmunah Saptui Water Point-ah hian nikhatah tui litre 25,000 a haw thin, a ti bawk.
Rev.R.Lalnunzira, AGS, BCM chuan Saptui chanchin tlangpui sawiin, ni 29.4.1903 ah BCM Missionary Pu Buanga leh Sap Upa te chuan Saptui hi tlan tanin an cheibawl tan a ti a, tun thleng hian BCM chuan la enkawlin, BCM Property pawimawh tak zingah a tel a, enkawltu Committee pawh siam a ni; a ti.
