“Kan tu leh fa lo la piang zel turte ngaihtuahin kan ram thing leh maute kan humhim angai” – Justice Michael Zothankhuma
08 Oct 2024: Mizoram Legal Services Authority leh Lunglei District Legal Services Authority te buatsaih “Public Education on Legal Services Environmental Protection, Sustainable Practices and Importance of Conservation” tih thupuia hmangin vawiin chawhnu dar 1:00 khan Lunglei Gov’t College RUSA Hall ah hun hman a ni a, Justice Michael Zothankhuma, Judge, Gauhati High Court leh Executive Chairman Mizoram State Legal Services Authority ni bawk chuan khuallian niin a hmanpui.
He hun hi Pi Gracy L.Bawitlung MJS, Member Secretary, State Legal Services Authority chuan a kaihruai a, Pu Vanlalenmawia MJS, District & Session Judge leh Chairman, District Legal Services Authority Lunglei chuan inlawmna thu sawiin, hlawk taka hun hmang tura kalkhawmte a duh thu a sawi.
Khuallian Justice Michael Zothankhuma chuan thusawiin, Thil siam leh mihringte hian inlaichinna kan nei a, mihring kan pung zel a kan ramngaw neih sa te, thing leh mau te kan humhalh zel loh chuan engtik hunah emaw chuan a rem mai dawn tih hriain, eizawnna avanga loh theih lohva ram kan vat anih pawhin duham lovin kan mamawh chin bak ti chereu lovang u, a ti. Pawisa ringawt hi kan ngaihtuah tur a ni lova kan chenna khawvel hi chen zelna tlak anih theihna tura kan buatsaih a, kan tu leh fa lo la piang zel turte ngaihtuahin kan ram thing leh maute kan humhim angai hle a ni a ti. Mahni tan mai ni lo thangthar lo la awm zel turte tana chenna tlak khawvel a awm theih nana evironment humhalh kawnga theihtawp chhuah tur leh a tichhe thei zawnga hmala lo turin Justice Michael chuan kalkhawmte a sawm a ni.
Khualzahawm Justice Nelson Sailo, Judge Gauhati High Court pawhin thu sawiin, kan chenna khawvel boruak hi a inthlak nasa hle tih kan hre vek a, boruak a lum chak em em a, kan lui tlanah bawlhhlawh tinreng kan paih a, chumi tui chu kan in leh a, kan environment siamtha tura kan harh a hun ta tak meuh a ni, a ti.
Dr.Vanramliana Deptt Of Zoology, Pachhunga University College leh Pi Lalthanmawii Kawlni Project Save Tlawng ten Environment a chhiat chhoh zel dan leh humhalh tura hmalakna tur kawng hrang hrangte kalkhawmte hnenah an zirtir a, Debora V.L Hmangaihi Lunglei Gov’t College in kalkhawmte zaiin a awi bawk.
Vawiina Environment humhalh kawnga inzirtirna hun hmannaah hian Lunglei Bawrhsap Pu R.Lalthazuala, DIG Southern Range Pu Lalthanmawia te bakah S.P Lunglei, LMC hotute, YMA Sub Hqrs hruaitute, Lunglei Gov’t College Principal leh a thawhpuite, Media lama thawktute leh mipawimawh thahnem tak bakah Lunglei Gov’t College Zirlaite an tel a ni.
