20 Oct 2025: Naktuk atanga Young Mizo Association Inkhawmpui lian vawi 75-na, Chengkawlawn Run, Sakawrdai a neih turah Mizo hnam humhalhna tur leh khauh zawka ILP kenkawh dan tur rel a ni dawn.
Naktuk ni 21 atanga Ningani zan thlenga neih tur Central YMA Inkhawmpui Lian inbuatsaihna chu peih thawhkhat tawh niin, vawiin hian palai engemawzat chuan Sakawrdai an pankhawm tan a ni. YMA Inkhawmpui Lianah hian thurel tur Agenda 10 a awm a, YMA khawih zingah Mizo hnam humhalhna lam, Mizoram chhunga hnamdang sumdawng, phalna nei lo tam lutuk tihtlem dan tur te, Mizo hmeichhiaten hnam dang pasala an neih zel loh nana inzirtirna kalpui te, Zohnahthlak chi peng hrang hrang Mizorama chengte zingah chi bil hmalakna a awm loh nana hmalakte a tel a, sorkar khawih agenda ah, khauh leh awmze nei zawka ILP kalpui tura sorkar ngen te, tui hna humhalhna dan siam rawt leh chak zawka Mizoram chhung inkalpawhna hrang hrang siam tura sokrar ngen te a tel a ni.
YMA inkhawmpui lian hi ram hruaituten an hmanpui dawn a, naktuk a tan zanah, bialtu MLA, Leader of Opposition, Pu Lalchhandama Ralte chuan a hmanpui dawn a, nilaini ah rorel a ni ang a, nilai zan vantlang inkhawm chu Chief Minister Pu Lalduhoma’n khuallian niin a hmanpui dawn bawk a ni. (DD)
