Kum 2024 Sept – 2025 Aug chhungin ram pumah duty laia martar police mi 191 an awm
21 Oct 2025: Vawiin October ni 21 hi India ram pumah an duty laia thi police-te sûnna hun ‘Police Commemoration Day’ a ni a, Mizoramah pawh hmun hrang hrangah hman niin, Aizawlah chuan 1st Bn. MAP Headquarters, Armed Veng, Aizawl-a martarte thlanah police thite sûnna leh zahna chibai bûkna hun hman a ni.
Lungleiah chuan tukin zingkar khan Deputy Inspector General of Police (Southern Range) Pu Altaf Ahmad Khan hovin Lunglei Luangmuala 2nd Battalion Mizoram Armed Police (MAP) hmunpuiah he ni pual hian hun hman a ni.
Lungleia Police Commemoration Day hmannaah hian DIG (SR) Pu Altaf Ahmad Khan leh a staff-te, Lunglei District Superintendent of Police Pu J.Lalmuankima leh a staff-te leh 2nd Bn MAP-a Commandant Pu Francis Lalnuntluanga Ralte leh staff-te an tel a. September ni 1, 2024 leh August ni 31, 2025 inkara an duty laia nunna chan police 191-te sunna hun hmangin, anmahni zahna chibai an buk a ni.
Kum 2024 September – 2025 August (kum khat) chhung hian India ram pumah an duty laia nunna chan (martar) police mi 191 an awm a. Chung zingah chuan a force malah Border Security Force (BSF) mi martar tam berin, mi 23 martar an awm a. State/Union Territory Police zingah Chhattisgarh chu martar tamna ber state niin, mi 16 an martar. Vanneihthlak takin Mizoramah erawh duty laia nunna chan an awm lo.
Police Commemoration Day hi kum 1959 October ni 21-a Ladakh Hot Springs hmuna China sipai kuta martar police 10 te hriat reng nan leh police martarte zahna chibai buk nan kum 1960 aṭang khan kum tin October ni 21-ah hman ṭhin a ni. (DIPR)
