22 Nov 2023: Mizorama kawngpui sial hna thawktu National Highway Infrastructure Development Corporation Ltd – NHIDCL chuan kum hnih chhungin Mizoramah inkalpawhna kawng tha tak siam zawh hman ngei an tum thu MLA Dr. L.Thangmawia an hrilh.
Dr Thangmawia chuan vawiin khan New Delhi-a NHIDCL Headquaters office a tlawh a, MLA hi General Manager (Technical) Pu M.Khalid chuan lo dawngsawngin MLA hian a bial kaihhnawih-a NHIDCL hmalaknate sawipuiin a zawtfiah bawk.
Dr. Thangmawia chuan a bial chhung Mimbung bul, Tuivai lui atanga Defence Road siam thar tur chungchang zawtfiah nghalin Tuivai kama tawp tawp lo va, Tuivai lei dawh nghal turin a ngen a. NHIDCL hotute chuan he Defence Road hi Lengteng bial Tuivai atanga intanin, Myanmar ramri hrut phei zelin Zorinpui-ah a tawp dawn tih lo hrilhin a project hmingah Indo-Myanmar Border Road (IMBR) an vuah thu leh km 780 a thui tur a nih thu te, Kum 2024 March thlaah Detail Project Report(DPR) an peih hman tur thu MLA hi an lo hrilh a, Tuivai lei dawh pawh DPR-ah an lo telh tur thu MLA hi an lo hrilh bawk a ni.
Dr. Thangmawia chuan November, 2021-a Chief Minister Pu Zoramthanga’n Hliappui atanga Kawlkulh, Puilo etc. kaltlanga Serchhip bula Lunglei kawng pawh tura National Highway thar Central sawrkar-a rawtna a lo thlen tawh chu kawng pawimawh tak tur a nih thu hrilhin, Sawrkar policy anga KMMTP kawng leh Myanmar-a Sittwe lawngchawlhna hman tangkai anih theih hunah chuan Mizoram hmarchhak mai bakah Manipur state tana Highway pawimawh ber tur a nih thu hrilhin, tuna Highway awmsa aia km 60 chuanga a tawi zawk dan tur map atangin an en tlang ho nghal a, hei hi a rang thei ang bera tihlawhtling turin a ngen nghal bawk. NHIDCL General Manager chuan theihtawp chhuaha a lo bawhzui nghal tur thu a lo hrilh a ni.
Human Resources Development Board Vice Chairman ni bawk Dr.L.Thangmawia leh Rajya Sabha MP Pu K Vanlalvena te hian nimin tlai khan Union Secretary of DONER Pu Chanchal Kumar chu a office chamber New Delhi-ah kawmin Mizoram mamawh thenkhat an thlen.
Mizoram MP leh MLA te chuan Central sawrkarin sum sanction order a tihchhuah tawh si, a taka pawisa pek an la nih si loh Aizawl by pass road PM Devine scheme harsatna tawh te leh Tuichangral kawngpui thenkhat laihna tur NESID Scheme harsatna thenkhatte bakah Lengteng bial chhung thil pawimawh thenkhatte an thlen a. DONER Secretary Pu Chanchal Kumar chuan a rang thei ang bera bawhzui sak a tum thu a lo hrilh a ni.
