Kuminah Sawhthing quintals 3,38,354 lei a ni

03 Nov 2025: Vawiin khan Mizoram Agricultural Marketing Board te chu an Chairman Chief Minister Pu Lalduhoma kaihhruaiin CM Conference Hall-ah an thukhawm a, kumina thlai thar leite an thlirlet.

Meeting-ah hian kuminah Sawhthing quintals 3,38,354 lei anih thu tarlan a ni a, a man pek chhuah tawh hi Rs. vbch 118.89 niin la pek chhuah loh Rs. vbch 20 vel a la awm.

Sorkarin sawhthing a lei zingah LPK Trip 7 chiah hralh ral lohvin a awm a, hetianga a awm chhan hi a chhe tur ven nana thliar (grading) a ngaih vang a ni. Hei pawh hi leitha siam nana lei diltu an awm mek. A dang zawng chu mumal taka tihral vek a ni.

Sawhthing lei leh hralh thua thil fel lo a awm leh awm loh chhuitu Investigation Team-te’n Champhai district an chhuichianna report an pe a. Thil dik lo an hmuhchhuahte hi sawrkarin a taka sum a la pekchhuah loh te an ni. Hetiang harsatna hi a awm tawh loh nan ruahmanna siam a ni.

Kumin sawhthing lei leh hralhna bikah hian Central Sorkar Market Intervention Scheme atangin Rs. vbch 9 vel hmuhlet beisei a ni.

Kum thar atana inbuatsaihna bakah hian NITI Aayog-in sawhthing chungchang sawihona a buatsaih tura tel tur an ruat a, Buyer Seller – Meet 2025 neih dan tur te, MAMB thuam chak dan tur leh thil dangte an sawi bawk.

Meeting-ah hian Pu PC Vanlalruata, Agriculture Minister, Pu C.Lalsawivunga, Horticulture Minister,  Pu Lalthansanga, LRS &WC Minister, Dr. KC Lalmalsawmzauva, Adviser to CM (Handholding) leh member te an tel a ni. (DIPR)