Leiminin a hnawl ruang la hmuh loh 5-te a nawlpuia zawn huaihawt khar a ni dawn
Kar kal ta Thawhlehni-a Cyclone Remal behbawm ruahpui vanawn sur avanga leiminin a hnawl ruang la hmuh loh 5-te Central YMA-in a nawlpuia zawn a huaihawt chu naktukah khar a ni dawn.
Thu dawn danin Central YMA hruaitute leh chhiat tawk branch YMA hruaitute hi inrawnkhawmin naktuk chawhnu lama a nawlpuia ruang zawn kharna hun hman dan tur an duang ang a. Mizo dana ni 7 zawn anih tawh dawn avanga a nawlpuia zawn hi khar tur a ni a, zawn chhunzawm zel tho tura ngaih a ni.
He chhiatna thlengah hian mi 34 an thi ni a hriat a ni a, an zinga mi 29-te ruang chu lak chhuah a ni a, Melthum ami ruang 4 leh Aibawk ami ruang 1 te la hmuh loh a ni. Melthum ami, leiminin an chenna a hnawl vanga la hmuh loh zingah hian naute thla 6 chauhva upa bakah kum 8 mi; mipa naupang leh kum 11 mi; hmeichhe naupangte an tel. Aibawk ami hi an nupaa a hnawl kha an ni a, Hortoki khaw bula Tlawng luia a nupui ruang an hmuh tawh hnuah a ni ruang hi zawn mek zel a la ni.
Hlimen branch YMA hruaitute hnen atanga thudawn danin an ruang zawnte hi chhiatna thlenna hmun hnai a awm tawh lova ringin a thlang lam lui dang leh Tlawng lui dung thleng a zawn a ni a. Central YMA ruahmanna angin Aizawl veng hrang hrang YMA branch leh chhiatna thlenna veng leh khua bakah an veng leh khaw thenawmte’n ruang zawn hna hi an thawk a ni. (AIR)
