28 April 2024: Nimin Inrinni khan Project Save Tlawng, Lunglei te huaihawtin tuia Lunglei khawpui chawmtu pakhat Pialthleng lui hnar leh a lui dung thenfai hnatlang neih a ni.
He hunah hian Lunglei thalaite thawk chhuakin Pukpui buk Pialthleng lui intanna hmuna kham panga bawlhhlawh paihte Adventure Club lamin hrui hmanga uaiin an thian fai a, helai Pialthleng hnar taka bawlhhlawh paih a nih tawh loh nan Prooject Save Tlawng leh PHE Lunglei tangkawpte chuan a hung hna an thawk bawk. Pialthleng hnar thenfai bakah hnatlang te hi insem darhin a lui mawng lam atanga a lui kuang thianfaitu pawl an awm bawk a ni.
Pialthleng lui hian Tlawng pawh thlain June thla atanga November thla thleng pump ngai lo, chhuk luanin Lunglei mipui tui intur a tum thei a ni.
Inrinni-a hnatlangah hian LMC Vice Chairman Pu K.Lalrinawma leh LMC Councillor dangte pawh telin PHE Dept a thawktute, Clean Lunglei leh Lunglei District Adventure Association te bakah Aizawl atangin Save the Riparian te an tel a ni.
