Lunglei khawpui hnaiha Railway station siam chungchang thlen

07 July 2026: YMA Sub-Headquarters Lunglei Inkhawmpui vawi 40-na Tlabung-a neiha Rorel thu pass umzuiin, vawiin khan Mizoram Chief Minister Pu Lalduhoma chu a pisa-ah YMA Sub-Hqrs Lunglei Office Bearer leh Project Committee puipate’n an hmu.

YMA Hruaitute hian Mizoram chhim lama Rail kawng kal turah Lunglei khawpui hnaiha Railway Station siam tura thlenin, Lunglei leh Chhimlam tana Economy hmasawnna tur bakah Kut hnathawka eizawng, a bikin thlai thar thawnchhuahna, Bungraw lak luhna awlsam bakah, Tourism Industry-in chhim lam a hrut kan loh nan te, Zirlaite leh ramchhung hmun dangte nena inpawhna tha awmna tura tul leh pawimawh anih thu thlenin, CM chuan rail kawng kal tur chu Lunglei bakah khawpui pawimawhte hnaih thei ang bera kal tir an tum thu a sawi.

Lunglei mai ni lo Mizoram tana hmasawnna luhka pawimawh leh tangkai tur Kawrpuichhuah ICP, thang hnih dawn lai liamta a bul lo tan tawh hmalakna awmzui lova hlamchhiaha awm reng pawh a tul anga Central Sawrkar lama DPR la tang mek chu Home Ministry lama Kawrpuichhuah ICP a hlawhtlin theihna tura hmalakna thar thawh tura nawr tura ngenna te thlenin, CM chuan India leh Bangladesh sawrkar indawrna kal mekah a theih ang angin a hlawhtlin theih nana hma lak an tum thu a sawi.

Chhim lam mite tana hnuk pawimawh leh tangkai tur Lunglei East By-Pass Road kan neih theih nan State Priority Project-a daha; DPR siama hmalaksak tura ngenna an thlen bawk.

Chief Minister chuan Western by-pass road pawh tihhlawhtlin tuma hmalakna hmawr bawk tep anih thu sawiin, Eastern By-pass road pawh a tul anga enzui zel anih tur thu YMA hruaitute hi a lo hrilh a ni.

Hei bakah SYMA Ram Pukpui a Youth Development Centre cum Multipurpose Conference Hall sakna tur DPR-te leh YMA Pandal Structure thlakna tur Gavanised Pandal Structure DPR YMA Sub-Hqrs Lunglei leh Lunglei Municipal Council-te’n an siam chu thlenin, Chief Minister chuan tihhlawhtlin ngei an tum thu YMA hruaitute hi a lo hrilh bawk.

YMA Sub-Hqrs Lunglei inkhawmpui Rorel thu pass zinga mi hun engemawchen khawih lova awm, AOC to 3 Gate resurfacing hna pawh tan thuai anih tur thu CM hian YMA hruaitute hi a lo hrilh a ni.

YMA Sub-Hqrs Lunglei hruaitute hian Sports Minister Pu Lalnghinglova Hmar pawh a pisaah hmu nghalin, hun rei tak Lunglei Thalaiten infiamna lama an hman tur vawiin thlenga hmalak chhunzawm theih lova awm State Sports Academy, Zobawk chu hmalak thuai nise an duh thu an thlen a. Minister chuan SSA atana Sawrkarin hma a lakna kal mek chungchang leh hmachhawpte hrilhin, Lunglei lamin theihna a lo neih tawh thinna Hockey infiamna lama hmalakna tura ruahmanna siam mekte YMA hruaitute lo hrilhin Mizo thalaite’n infiamna lama kan theihna contact sports lama tan lak mek anih dante a lo sawi bawk.

Chief Minister hmuhnaah hian SYMA Lunglei aiawhte hi Pu T.Lalhlimpuia MLA, Lunglei West leh Pi R.Lalrodingi OSD to CM-te’n an tawiawm a ni.