Lunglei Police –te’n Mobile phone bo leh ruk 11 hmu letin a neitute hnenah an hlan
17 May 2024: Vawiin chawhma lam dar 10:00 khan Lunglei Police Station-a Cyber Cell-te hmalaknain Mobile phone bo leh ruk zawnchhuah hna ngawrh taka chhui hnua hmuh let leh Mobile Phone 11-te chu a neitu dik takte hnena hlan letna hun hman a ni a, Lunglei SP Pu J.Lalmuankima MPS-in a hmanpui.
SP Pu J Lalmuankima chuan Lunglei Police Station-a Cyber Cell-te hnenah lawmthu sawiin; an thawhrimna avanga hetiang zat mobile phone bo hmuhlet leh a ni hi fak tlak an ni a ti a. Tunlaiah IT lama changkanna kan umphak ve zel a tul thu sawiin, tuna kan hlawhtlinna pawh hi Central Equipment Identity Register (CEIR) portal awmze nei taka kan hman tangkai vang a ni tiin, tunlaiah sualna pung chho zel mila Police-te pawhin hmasawnna kan neih chhoh ve zel a tul a ni, a ti. Mipuite hnenah thu chahin, hetiang mobile bo rinhlelh awm tih hre reng chunga lo leisaktute emaw lo thlengtute emaw chungah pawh action kan la zel dawn a; tun hnaiah hetiang diklo taka lo leitu (receiver of stolen property) te hi man kan nei nual tawh a ni tiin, Mobile bo/ruk hmulettute a lawmpui thu a sawi bawk.
Tuna Mobile phone bo hmuhlet te hi April ni 23, 2024 atanga May ni 16, 2024 inkar chhunga chhui chhuahte an ni. Lunglei Police-te chuan mipuite hnenah thu chahin, Mobile phone second hand kan lei dawn reng rengin Black list nge White list anih finfiah hmasak phawt hi a him ber a; Google search hmangin CEIR portal emaw Cyber Crime portal emaw atangin awlsam tein tute pawhin kan finfiah thei reng a ni, an ti.
Lunglei Police-te hian thla hmasa khan hetiang bawk hian mi 11-te mobile phone bo leh ruk hmuhlet sakin, a neitute hnenah an lo hlan let tawh a ni.
