Lunglei veng thenkhata mihring tana hlauhawm thing tlu mai theite kih phalna pe
Lunglei District Disaster Management Authority (DDMA) chu an Chairman Pi Ramdinliani, Lunglei DC kaihhruaiin Sept ni 1 khan kumin fur ruahtui tlak tam avanga chhiatna thlengte thlirletna leh leimin leh leimin tamna hmun tihziawmna leh tihngheh dan turte sawihovin an thukhawm.
Sept ni 1-a thutkhawmah hian Zotlang Tourist Lodge panna kawng lei tlakhniamna hmun chungchang Zotlang Local Council Chairman hnen atangin ngaihthlak niin he lai hmun hi Geology & Mining mithiamte’n lei tlakhniam chhan leh leilung te zirchiang tura tih a ni a, Tourist Lodge panna kawngah lirthei a luh theihloh avangin approach road siam dan tur PWD-in an enfel bakah lei tlahniamin ATL Road a hnawhte paihdan tur ngaihtuah tura tih a ni bawk. Helai hmuna Inhmun neite zawnchhuah leh hmun him lova puan nise tih sawihona neih a nih bakah helai hmunah hian tunhma-in tuikhur pahnih awm thin chu tha taka tuaihnum leh nise tih rel a ni.
Zobawk South NH-54 leiminna lai chu lirthei veivak khaihlak lova a tlan theih nan NHIDCL-in thenfai hna thawk tura tih a ni a, leiminna zawna cheng chhungkua pali inthiarchhuak te chu Disaster Management & Rehabilitation Dept atangin chhawmdawlna pek tur tih niin; Pukpui leh Tlawng inkar kawng leimin leh khuar laite PWD-in hma an lak mek thu tarlan a ni bawk.
Lunglei khawpui chhunga veng thenkhatah thing tlu mai theiin leh mihring tana hlauhawmte chu DDMA-in kih phalna pek a ni. NHIDCL-in Lunglei to Tlabung kawng NH-302 hma an lak mek dan sawiin Tlabung SDO(C) Pu Zonunmawia chuan Khawthlangtuipui lianin Tlabung leh a chhehvel khuaa In leh lo, buh leh bal, huan, sangha dil tihchhiat dan leh hmalak dan te a sawi bawk a ni. Tuilian kamin hmun thenkhatah tuitling a siam a, heng hmunah hian thosi a tipung a, natna a pun loh dan ngaihtuah sak turin a thlen bawk a ni.
