Lungleiah State University

03 November 2025: Lunglei District Congress Committee chuan vawiin chhun dar 12:00 khan LDCC Bhawan-ah Leaders Meet cum mi thar lawm luh inkhawm an buatsaih a, MPCC Treasurer, Dr.Lalmalsawma Nghaka chuan khuallian niin a hmanpui.

He inkhawm Pu R.Lalnunthara LDCC President kaihhruaiah hian MPCC Treasurer Dr.Lalmalsawma Nghaka chuan, tute sawrkar laiin nge Lunglei leh chhim lamin hmasawnna a hmuh thin tih ngaihtuah chian angai a, mahni thutiama dinga hmasawnna thlen thin chu Congress Party a ni a, vawiina kan Sawrkar anga inkhualtelem mai mai hi a hun tawh lo a ni, a ti. Vawiina kan Sawrkar hian Mizoram Budget hi mipuite ban phakah a awm an hlau a thil a harsa zawng hlirin an kalpui a bana kaih loan diltu mi sing chuang zingah mi zasarih vel chauh an thlang thei a chutihlaiin Bank lamin za chuang fe an reject leh nghal a Congress Party chuan mi nuai chuang hnenah NLUP kan pe thei a ni a ti. MZU Southern Campus Lungleia a awm theih nan tute sawrkar nge theihtawp chhuah thin Pu Lal Thanhawla sawrkar a ni tihte hi kan ngaihtuah let a tha a, Congress Sawrkar a tlak tak avangin a zuzi zo ta a ni tiin, Lungleia State University awm te hi a remchanga a inhmeh bawka Pathian zarah Congress a sawrkar chuan State University hi Lungleiah kan dah dawn a ni MPCC Treasurer chuan a ti. Congress Party zawm thar MNF, ZPM leh Neutral atangin mi 61 a lawm lut nghal niin LDCC thuchhuah chuan a tarlang.

Pu Lalbiakzama G.S MPCC, MPCC Spoke Person ni bawk pawhin thu sawiin, hruaitu pawimawhna sawiin, hruaitu tha chu a hun leh a hmun azira thil thlir thiam nih angaia tunah hian keini hi Mizoram mipuite hian hruaitu atan min ringngam angem tih kan ngaihtuah theuh tur a ni a ti.

Vawiina hun hmannaah hian Rev.Lalfakawma District Secretary UPC (NE)-in hunserh a hmanga, Pu Joseph R.Lalremngheta LDCC Vice President-in report pein, lawm luh tharte atangin Pu Lalhmachhuana, Phaileng South MNF atanga Congress Party zawmtu chuan thu a sawi a, Lalenkawli Pautu leh F.Laldinmawii-te’n kalkhawmte zaiin an awi a, Pu Eric R.Zomuanpuia LDCC Treasurer-in lawmthu sawiin hun a khar.