07 Aug 2025: Tourism Department, Govt. of Mizoram leh Indian Railway Catering & Tourism Corporation (IRCTC), Ministry of Railways hnuaia PSU te chuan vawiin chhun khan Mizoram a Tourism hmasawnna atan thawhhona thuthlung an ziak.
Thawhhona thuthlung hi Lalthakimi Pachuau, Joint Director, Tourism Department leh RN Ranmung, Chief Regional Manager, IRCTC, Guwahati ten kum hnih atan an nemnghet a ni. He thawhhona thuthlung hian nasa leh zuala Mizoramin tourism lama hmasawn theihna tura hmalakte, khualzin te awlsam zawka an inkal pawh theih nan te, awmze nei zawka khualzin te hmunhma an tlawh tur an tlawh theih nan te leh an hmun tlawh turte an duhdan mila duansak bakah khualzin tam zawkin Mizoram an tlawh theih nana hmalakte leh thildang tam tak a tel a ni.
September, 2025 a rail lu Aizawl a lo lut mai tur atana thawhhona tangkai tak a ni dawn a. IRCTC hian Mizoram mipuite khawvel hmun zau zawk nena thlunzawm turin October thla chhung hian Special Tourist Train rawn luh tir an tum thu an sawi. Mizoram hmunhma mawi leh tlawh tur awmte tour package a siamin zau zawka khualzin hip theihna tur kawngah nasa takin hma an la dawn a ni. (DIPR)
