20 Aug 2025: Ni hnih awh tur “National Conclave on Cocoa, 2025” chu vawiin khan Assam Agriculture University, Jorhat-ah hawn a ni a; Pu PC Vanlalruata, Minister, Agriculture & Farmers’ Welfare Department, Government of Mizoram chuan khuallian niin a hmanpui.
Khuallian Pu PC Vanlalruata chuan India ramin chocolate siamna atana Cocoa kan mamawh zat chu metric ton 1,20,000 a nih laiin, tun dinhmuna India ramin a tharchhuah chu metric ton 22,000 chauh a ni a, India ramin kan mamawh za zela sawmriat hi ram dang atanga lakluh a nih avangin sawrkar laipui pawhin Cocoa plantation zau zawka kalpui a nih theihna turin hma a la chho mek zel a. Cocoa chu Chocolate siamna atan mai bakah, damdawi siamna (pharmaceutical) industry lamah te, cosmetic siamnaah te leh chhang siamna (confectionery) lamah te thlengin a tangkai em em a ni, a ti.
Pu PC Vanlalruata chuan Mizoram Sorkar-in kuthnathawktu (Farmers) te’n hlawkna an tel tam lehzual theihnan inter-cropping kalpui tum a nih thu leh, Oil Palm leh Tung cultivation karah inter-cropping tur atan Cocoa chin hi a that hle dawn thu a sawi bawk a. Eng thlai pawh ching dawn ila, a pawimawh hmasa ber chu farmers te’n a chi tha an dawn ngei theihna tura hmalak hi a ni tiin, hemi kawngah hian Directorate of Cashew & Cocoa, Government of India te chu thawhpui atan a sawm nghal a ni.
Minister chuan remchang la in Directorate of Cashew & Cocoa hotute chu Mizoram tlawh a, Mizoram kuthnathawktute zirtirna pe tur leh Mizoram-ah Cocoa nursery dinpui turin a sawm nghal bawk. Directorate lam pawhin Minister sawmna hi tihhlawhtlin ngei an tum thu an hrilh nghal a ni.
He National Conclave hi Dr. Femina, Director, Direcorate of Cashew & Cocoa Development, Government of India-in a kaihruai a, India ram state hmun hrang hrang atangin kuthnathawktu leh scientist rual an fuankhawm a ni. (DIPR)
