Mizoram Police chuan Mizo thalai housemaid hna thawk, harsatna tawkte tan theihtawp chhuahin sorkarin hma a la tih an sawi
24 May 2024: Mizoram Police chuan Syria leh Dubai rama Mizo thalai, awmpui (housemaid) hna thawka awm, harsatna tawkte tan theihtawp chhuahin sorkarin hma a la tih an sawi.
Mizoram Police thuchhuaha a lan dan chuan, Mizo thalai ram danga awmpui hna thawkte harsatna an tawh chungchang social media-ah tarlan a nih thu an ziak a, Mizo hmeichhe pathum – Vaivakawna inbengbel E&K Agency ten kum 2022 November ni 6 a an thawnchhuah ten harsatna an tawh chungchangah Mizoram sorkarin a ngaihsak tawk lo nia thu thang chu thu belhchian dawl lo a ni, an ti.
Police sawi dan chuan, Syria-a harsatna tawkte hi Mizoram soarkarin a buaipui a, a khua leh tui ram danga awm ten harsatna an tawh hi Chief Minister leh Home Minister ten an ngai thutak a, heng case-te hi uluk taka vil reng a ni, an ti a, ram danga Mizo hmeichhia harsatna tawkte chu a rang thei ang bera Mizorama hruai haw an nih theih nan hma an la zel dawn niin an sawi bawk.
Syria chu ram buai a nih avangin official-a thil bawhzui a harsa an ti a, hetiang ani chung hian Mizo harsatna tawkte chu Mizorama an haw theih nan a tul angte chu an ti zo thuak tawh niin an sawi.
Mizoram Police hian Dubai-a harsatna tawk Lalkhumtiri chu Chief Minister leh Home Minister kaihhruaina in May ni 9 khan him takin Mizorama hruai haw a ni tawh, an ti a, Mizoram sorkar chuan hetiang thil hi uluk takin a chhui zui zel dawn tih an sawi bawk. (AIR)
