08 April 2024: Mizoram Rural Bank hnuaia loan rul tha duh lo mi 5 te chenna in chu Champhai DC thupek angin tun hnaiah kalhsak an ni.
Champhai DC Pu James Lalrinchhana chuan SARFAESI Act, 2001 hnuaiah Champhai khawpui chhunga loan rul tha lote mi 5 te laka dan kengkawh turin thupek a tichhuak a. Hemi bawhzui hian tun hnaiah an chenna in chu khawih chet theih lohvin kalhsak an ni a, an loan aiah lilam tura ruahman niin thudawn a ni.
Chenna in an kalhsak zingah hian Mizoram Rural Bank, Champhai Branch-a loan-a inbumna chungchanga inhnamhnawiha puh Pu PS Zatluanga chenna in pawh kar hmasa khan kalhsak a ni a. He thubuai hi thla hmasa khan Lokayukta chuan complain a dawn bawhzuiin CBI te a chhuina hmahruai nei turin a lo ti tawh a ni.
Mizoram Rural Bank, Champhai Branch atang hian Champhai leh Khawzawl District-a khaw hrang hrangah Self Help Group hmingin KCC loan cheng nuai 2 zel pek chhuah a ni a. Loan laknaa hming tumtute chuan cheng 1,20,000 changin, a buaipuituten cheng 40,000 an hlawh thung ang, tiin an inremsiam a. Loan latute hian sum an hmuh hmain bank atangin a thinna an dawng thung a. Kum 2022 kumtir khan an mangang chuan Champhai Police Station-ah FIR an thehlut a, pawikhawihtua puh mi 5 te chu man an nih hnuah bail-a chhuah an ni a. Tunah an zinga pakhat chenna in chu DC thupek anga kalhsak a ni ta a. A chenna in leh a chhunga bungraw awmte chu khawih chet theih lohva hren niin, in chhung bungrua erawh an kalh hma hian a lo thiar chhuak hman nia hriat a ni.
He inbumnaah hian cheng nuai 2161 bawr vel a chingpen niin Lokayukta-a complaint lut chuan a tarlang bawk. (DD)
