Mizorama zu siamchhuah te a hlauhawm bik ni-a sawi avangin zu sample zirchian mek a ni
11 March 2025: Excise and Narcotics Minister Pu Lalnghinglova Hmar-in Mizorama zu hlauhawm nia sawite mihring tana a hlauhawm zia chipchiar taka pholang turin Delhi-a Central Laboratory-ah endik tura hmalak mek a nih thu House a hrilh.
Vawiina Assembly sessiona zawhna leh chhanna hunah Excise Minister chuan Champhai South bialtu, Lt. Col. Clement Lalhmingthanga zawhna chhangin, Aizawl chhehvela zu hmunpui ni-a sawi, Rangvamual, Phunchawng leh Tuikhurhlu-a zu te chu dan phal lohva siam leh zawrh vek a nih thu leh heng zu siam leh zuar te bakah a in te chu dan tlawhchhana man zel an ni a ti a, kumin January ni 20 khan Mizoram Police te nen joint operation neiin mi 150 lai man an ni tih sawiin zu siamna hmun 101 lai tichhiain rakzu litre 1083, zu bilhlai tin 25,556 leh zu bilhna bel lian 96 tihchhiat a ni a ti a, Mizorama zu siamchhuah te chu nunna atan a hlauhawm bik ni-a sawi a awm avangin zu sample chu New Delhi-ah zirchian mek a ni a, result a la chhuak lo tih a sawi bawk.
Excise Minister chuan Assam Rifles nen an thawh hona a tha hle tih sawiin Champhai leh Saitual District chu ruihhlo kalkawng a ni tawh a ti a, ruihhlo lut a tam em avangin an in veng senglo tih a sawi.
Minister chuan a senchi lane ti-a sawi, Vaivakawn, Zohnuai pheia zu zawrh titawp turin nikum June thla khan Excise department chu Vaivakawn khawtlang nen tangrualin theihtawp an chhuah hnuah a ziaawm tawh hle a ti a, hetihrual hian a aia hla zawk Rangvamual leh Phunchhawng lamah zu chhe zawk chu thalaiten an in zel tho avangin he thila hmalak dan tur chu ngun taka ngaihtuah ho a ngaih thu sawiin khawpui laili leh hmun pawimawh laia ruihhlo hluar tur chu a theih chin chin an ven thu a sawi a, thalai ruihhlo ngaite hmachhawn dan kawngah ngaihtuahna sen nasat a ngaih thu a sawi bawk. (AIR)
