Mizoramah vote nei mipa – 3,99,025 leh hmeichhia – 4,29,881

04 July 2026 : Special Intensive Revision (SIR) 2026 thawh thumna kalpui mekah, Mizoramah vote nei mipa 3,99,025 leh hmeichhia 4,29,881, an vaiin mi 8,28,906 an awm.

Vawiina Chief Electoral Officer Pi Garima Gupta-i’n I&PR Conference Hall, Aizawla thuthar thehdarhtute a kawmnaah he thu hi a sawi a ni.

Vote nei zingah thalai kum 30 atanga kum 39 inkar tam berin mi 2,31,879 an awm.

District hrang hrangah pawh Draft Roll hi vawiin khan tarchhuah a ni.

Lunglei District-a assembly bial paruka Enumeration Form theh lutte hming chuanna draft electoral roll pawh vawiin khan Lunglei District Election Officer Pi Navneet Mann chuan Lunglei DC Conference Hall-ah a tlangzarh a. Draft electoral roll hi political party aiawhte leh tlawmngai pawlte hnenah hlan nghal a ni.

SIR 2026 draft electoral roll tlangzarh takah hian Lunglei District chhunga assembly constituency parukah vote nei mi 98,808 (mipa 48,918 leh hmeichhia 49,890) an awm.

SIR 2026 kalpui mekah hian India khua leh tui kum 18 tling chin, July ni 1, 2008 leh a hma lama piangte tan August ni 4, 2026 thlengin electoral roll-a inziah luh thar, paih, insawn leh siam ṭhat dilna hun hawn a ni a. Dilna hi BLO-te kal tlangin emaw, ERO-te hnenah emaw theh luh theih a ni a. Dilna lutte chu ERO-te’n dan anga an chin fel hnuah, September ni 6, 2026-ah final electoral roll chu tar chhuah tura ruahman a ni.