Lunglei; 11 October 2023: Nimin khan MNF Sub Hqrs Lunglei President Pu Vanlalhmuaka leh a thawhpuite chuan tualchhung thuthar thehdarhtute Mizo Hnam Run a President room-ah an kawm.
Pu Vanlalhmuaka chuan MNF Sub Hqrs Lunglei thu leh hla te Media lamin an puanzar sak thin avanga lawmthu sawiin, inthlanpui lo awm turah pawh an thu leh hla puanzar sak zel turin a ngen. Tuna MNF Sub Hqrs Lungkei hruaitute chuan MNF Sub Hqrs chu a tha thei ang bera hruai an tum thu leh thil awm ngailote pawh tih tur tam tak an nei tih sawiin, hruaitu mawhphurhna an chelh hnuah mi sang chuang MNF Party ah an lawmlut tawh tih sawiin October ni 12.2023 hian Chief Minister hova Conference an neih turah mithar thahnem tak an lawmlut bawk dawn niin a sawi.
MNF Sub Hqrs President chuan kum 2023 MLA inthlanpui lo awm turah Lunglei District-a Assembly bial parukah hnehna chan vek an beisei tih sawiin, chutiang tur pawh chuan nasa takin hma an lak mek thu a sawi a. Tunhnaia MNF Sub Hqrs President hlui pakhatin an Party a chhuahsan chungchangah chhuaklo tura an ngen thu leh a chhuah tak avanga an Party tan harsatna a siam zui an hriatloh thu zawhna chhangin Pu Vanlalhmuaka chuan a sawi. MNF Sub Hqrs hruaitute chuan Lunglei Municipal Council (LMC) inthlan zawh takah khan chak an inring lo sa tih sawiin, LMC inthlan laia an Party boruak leh tun dinhmuna an boruak chu danglam tak a ni tiin; LMC a an tlakna chu malsawmnaah a chang dawn niin an sawi.
Chanchinbumi te zawhna chhangin BJP chu ram dinhmun siamthat nana zawm mai an nih thu leh thil dangah an zawm lo tih sawiin, inthlanpui lo awm turah an khingpui lian ber tura an ngaih chu Congress Party an nih thu an sawi.
SEDP dawng turin MNF nih tir kher an tum em tih zawhna chu SEDP vang a ni emaw nilo emaw member tam thei ang ber lakluh chu Party in a tum a nih thu sawiin, SEDP dawng zawng zawngin MNF ah Rs 10 an pe veklo niin an sawi bawk.
