MSMPC-in Pialthlenga Tlawng Lui khuah an enfiah

18 March 2026: Vawiin chawhma khan Mizoram State Monitoring Project Committee Secretary Er.R.Lalthanzuala leh member dangte’n Lunglei chawmtu Pialthlenga Tlawng Lui khuah mek Rs Vbch 4 chuang man chu an enfiah.

MSMPC Secretary Er.R.Lalthanzuala chuan tuikhuah hnathawktute Contractor leh a enkawltu Lungleia PHE Department hotute a hriat duh ang ang zawt fiahin, Technical thila tih tur hrang hrangte an ti tha em tih a zawt a, hnathawh chu tha thawkhat a tih thu leh tuna an hna kal lai mek; tui luanliamna tur Spill Way an thawh meka an tih dan thalo a tih te sawi selin, tih dan tur a hrilh a. Hna zawh hun tura ruahman March thla chhung ngeia zawh hman tum turin Contractor hi a hrilh a, hmanrua inlakhawm tha tur leh a tul anih chuan zanah pawh hna thawk turin a hrilh a ni.

Lunglei khawpui chawmtu tun a Tlawng Lui khuah mek hi tui litre maktaduai 240 tlin theihna tur niin tun dinhmunah litre maktaduai 210 khuah tlin theihna hna an thawk tawh.

MSPMC team-in an tlawh lai hian litre maktaduai 180 tling mekin; tun a tling mek hi tui dang luh belh miah lo mahse Lunglei mipuite ni 50 vel daih thei tur niin Department hotute chuan an sawi.

Tuikhuahah hian bawlhhlawh, pawnchhia leh plastic bur ruak hmuh tur a tam hle tawh avangin lui kawrah bawlhhlawh paih mai mai lo tura khawtlang hruaituten hmalak tul an tih thu PHE Department hotute chuan an sawi bawk.

Tuikhuah hna hi March thla chhunga zawh tur tih ni mahse a tui luanliamna tur Spill Way leh Apron an siam mek erawh March thla chhung hian an zawh hman a beisei awm lo.

State Project Monitoring Committee team-in vawiina an tlawh lai hian PWD Quality Control Sub Division Lunglei chuan Rebound Hammer hmanga an hnathawh te hi endik nghalin, a tha tawk niin an sawi.

Vawiin vek hian MSPMC team dang Er.Sanghrima kaihhruai team chuan Pukpui thlanga UD & PA hnuaia Solid Waste Management Centre hnathawh mek an enfiah bawk.