MZP Hqrs Lunglei leh PWD hotute’n ATL kawng siam chungchang an sawiho

03 Nov 2025: Vawiin chhun khan MZP Hqrs. Lunglei leh PWD Lunglei hotute chuan ATL kawng siam chungchanga hmalakna awm mekte an sawiho. Tun dinhmunah kawng siamna tur lung lakna hmun thlak niin, estimate-te pawh hemi avang hian siam ṭhat leh anih thu PWD hotute chuan an sawi a. Lung hi lung ṭha leh a tling ngei Changte thlen hma Zawngekkham quarry aṭanga lak tur a ni a, kawng siamtu turte hian tunah hian Mausen-ah Primary Crusher khawl an bun fel ṭep tawh a, Bitumen plant pawh bun vat tura ruahman anih thu PWD lam chuan an sawi bawk.

ATL kawng siam hi a bul ṭanna atan Mausen aṭanga Tlawng lei bul thleng siam phawt tur a ni a, hemi hnu hian Mausen-Kanghmun S leh Tlawng-Lunglei leh Lunglei khawpui chhung te khawih chhunzawm tura ruahmanna siam a ni.

MZP Hqrs. Lunglei chuan kawng ṭha leh tlo tak kan neih theih nan mipuite chu dawhthei taka kawng siam chhung nghak thei tur leh kawng siam anih chhunga thuneitute thuchhuak ngaih pawimawh sak turin mipuite a ngen a, kawng siam hi MZP Hqrs. Lunglei chuan a enzui zel dawn tih a sawi.