MZU leh ICWA, New Delhi te tangkawpin a buatsaih ‘India Foreign Policy Seminar’
25 Nov 2024: Vawiin khan ni 2 chhung awh tur, Department of Political Science, Mizoram University leh ICWA, New Delhi te tangkawpin a buatsaih, National Seminar on “India’s Foreign Policy: Coping with the changing World” chu tan a ni a. Seminar hawnna program hi I&PR Minister Dr Vanlalhlana chuan khuallian niin a hmanpui.
Dr Vanlalhlana chuan Ram pawn lam nena thawhhona atana kan policy – Foreign policy kan tih mai hi Tualchhunga Policy kan neih dan nen nghet takin a inkungkaih avangin, Tualchhung lam hi Foreign Policy mumal nei tur chuan kan inchinfel hmasak a ngai thin a ti.
Research base zela kal hian policy duan pawh a ṭha duh a, hei hi research scholar leh academician ten kan hriat a pawimawh a. Sawrkarin eng policy pawh a siam dawna rawn tlak research work nei tura kan ṭan a ngai a ti.
I&PR Minister chuan Mizoram awmna lai hi India ram tan ASEAN ram kan tih te, Bangladesh, Myanmar leh Indo-Pacific biala ram dangte a dawrna turin “Kawtchhuah” a nih bakah India ram leh heng ram kan sawi te dawhzawm tu “Lei” ang pawhin a sawi theih a ti. Act East Policy huang chhunga Indian Foreign Policy a Mizoram pawimawhna leh Mizoram tana hamthatna tur awm thei ang chi te pawh mithiam rual inrawn khawm chuan uluk taka zirho turin a chah bawk a ni.
Seminar hawnnaah hian Khualzahawm Amb. Rajiv Bhatia, Distinguished Fellow at Gateway House, Mumbai, Prof D. C.Deka, Vice Chancellor, Mizoram University, Prof Tenepalli Hari, Professor, Dept. Pol Sc. Assam University leh Dr. Tunchinmang Langel, Represenative, ICWA, New Delhi ten thu an sawi a ni.
