Ram leh Hnam Ro tling tak tak thil ngaihtuah turin phut

03 Nov 2025: Tukin khan Pu Chawngthanmawia, Vice President MNF Sub Hqrs Lunglei chuan Lunglei West AC khua Phairuangkai, Chhumkhum, Rangte leh Lunglei South AC chhunga khaw thenkhat Lalnutui, Lungrang ‘S’ leh Rualalung khua te tlawhin, heng khuaa MNF unit hruaitute chuan an lo dawngsawng a ni.

Pu Chawngthanmawia chuan, ZPM sawrkar mek kaldan en hian Mizoram mipuiten a huhova kan tihsual lian ber chu ZPM kan lo en chhin hi a ni, a ti. Kalphung thar, ban a kaih, Kuthnathawktute hmakhua, kawngpui tha, spiritual goal min tiamtute, kum hnih zet an sawrkar tawh hnu hian heng an intiamna hi kan thleng lo mai ni lovin kan la hlat hle. Sawrkarna lo siam tawhtute kawngpui siam an zawh par par a, Sawrkarna lo siam tawhtute thlawhna tum hmun siam atangin an thlawk chhuak a, Delhi leh Khawvel hmun hrang hrang an dawr a, rualawtin Zoram an lo let a, Sawrkarna lo siam tawhten harsa taka an sual chhuah hriatthiamna nei lovin, an dem zui char char a, hralh theih theih hralha, Hnam rohlu tam tak suma chantir an tum a, Ram leh Hnam himna derthawn thei thil thlengin ruahmanna an siam a. ZPM te hian kan rual û zawkte inpekna leh tawrhna te, Mizo Pasaltha Hnam Martar te kha zah ve rawh se, a ti.

Chhim lama an MLA-te pawh beiseina nen mipuiten kan thlir mek laiin, Chhim mipuite tibeidawngtu an ni mek a nih hi, Pu Chawngthanmawia chuan a ti a. Thangtharte hmakhua thlirtuten Mizoram State University Demand Committee Lunglei hial he sawrkar mek hnuaiah hian din a ni a, mipuite mamawh tak tak thilah hian an rilru pe tawk lo tih hi a lang chiang hlein ka hria, a ti. Vision 2026 ni awm tak Lungleia Miss Universe Mizoram buatsaih tum ani tih te, mipuite mamawh a ni em? inthlan hmaa mipuite hnena an inzawrhna ni miahlo leh an beisei pawh nilo te ai chuan kuthnathawktuten beisei taka an thlir an sawhthing man ba ngaihtuah sak te, ATL Road chungchang mipuite hnena beisei awm taka an inzawrhna hi ngai pawimawhin Ram leh Hnam Ro tling tak tak thil ngaihtuah turin kan phut a ni, a ti bawk.

MNF Sub Hqrs Lunglei Vice President team-te hi zaninah Lungsenah an riak ang a, naktukah MNF President Pu Zoramthanga leh a team-te’n Lungsen-a mithar an lawm luhnaah an tel ang.