12 Aug 2024: Vawiin khan Chief Minister Pu Lalduhoma chuan a office-ah Synod Social Front hruaitute a kawm.
Chief Minister chuan eirukna tibo tur leh eiruk chingte chunga dan anga hmalak anih theih nana Lok Ayukta an thuam chak chhoh mek dan te, India dan tharin a phut ang thlapa CBI hnena general consent an pek thu te, restricted tender chu dan ang thlapa kalpui an tum thu te social front hruaitute hi a lo hrilh a. Revised estimate siam hi project date of completion pawhsei nen a kal kawp duh hle a, kan hunah hian heng thil pahnih hi tihbo kan tum, a ti. A umzuitu tur mipui huapzo Project Monitoring Committee kan din a, Team paliah insem darhin endik hna an kalpui mek a, anni’n engkim chipchiar leh uluk taka an endik hnua an remtihsak hnenah chauh project cost revised leh date of completion pawhsei hi kan phalsak dawn a ni, a ti. Contract hralh chhawn pawh tihbo an tum thu a hrilh bawk.
Chief Minister chuan sawrkar chu kohhran te thurawn leh zilhna te ngaithla turin a inhawng em em a, rawn inthlahrung reng reng suh u, tiin Synod Social Front hruaitute chu a chah a ni.
Synod Social Front hruaitute chuan, kohhran chuan sawrkar hi tha taka thawhpui che u kan duh a, chutih laiin sawrkar kalphungah sawisel tur a awm chuan kan sawi hreh dawn chuang lo, an ti a. Synod in Corruption do a lo rel te bawhzuiin sawrkara thlen tur chi an neih te an rawn thlen a. Lok Ayukta tihchak te, restricted tender chu loh theih loh chauh kalpui te, project cost ennawn (revised) tihbo te, contract hralh chhawnleh tihbo te tha an tih thu an thlen a. Eirukna do tura kohhran huang chhunga hma lak an tum dan te pawh Chief Minister hi an hrilh bawk.
