Revenue Dept; dawr nuam tak dept an nih zel theih nan tan an lak thu Minister-in a sawi

31 Oct 2025: Minister of State for Land Revenue & Settlement Department, Pu B.Lalchhanzova chuan Hnahthial Deputy Commissioner Office-ah Revenue Office hawngin Hawnna Programme-in a chhunzawm nghal a, Licensed Surveyor nei turin hma an lak mek thu a tarlang. Bialtu MLA, Pu Jeje Lalpekhlua chu khual zahawm niin, programme hi Bawrhsap, Pi K.Vanlalruati’n a kaihruai a ni.

Minister chuan Hnahthial District-ah Revenue Office hawn a ni thei ta chu hmasawnna ropui tak a nih thu sawiin khaw mipuite leh hnathawktute thawhrimna zar a nih thu a sawi a. Mipui tam takin Revenue Department an sawiselna pakhat, dawr nuam lo an tih thinna chu hriain tunah chuan khami kawngah nasa takin hma an sawn tawh thu a sawi a, dawr nuam tak department an nih zel theih nan tan an lak thu a sawi a. Online File Tracking System, mahni awm hmun atanga File thlen chin hriat theihna tur chu bawhzui mek niin hei hian File hup bo, File tang leh tih bo tam lutuk a tihreh an beisei thu a sawi a ni.

An hmachhawp lian tak pakhat chu Licensed Surveyor neih a nih thu tarlangin, chung Licensed Surveyor-te chu ram teh leh a tul apiangah, rate mumal tak nena chhawr an nih tur thu a tarlang bawk.

Hnahthial Revenue Office tana post siam zat:-

ADC/ASO :- Post 1, Surveyor – I :- Post 1, Surveyor :- Post 2, Revenue Assistant :- Post 1, LDC :- Post 1, Peon :- Post 1 Tun dinhmunah hian post 4 :- Surveyor-1, LDC, Revenue Assistance leh Surveyor post chauh hnawh khah rih an la ni. Settlement Officer (SO) charge hi Addl. DC, Pu Zothanmawia Khiangte chuan a la a ni.