Ruah sur avangin harsatna hrang hrang a thleng

08 July 2026: Ni hnih chhung chhum lo chat lova ruah a sur avangin Lunglei khawpui leh a chhehvelah harsatna hrang hrang thlengin nunphung a khaihlak nasa hle.

Theiriat a leimin avangin nizan tan tirh atang khan kawng a ping a, chanchin buatsaih lai thleng hian lirthei eng chi mah a la tlang thei lo. Hetiang anih avang hian khualzin tangkhang thahnem tak Theiriatah hian awmin tukin khan Theiriat YMA-te chuan khualzin tangkhangte hi eirawng an bawl sak. Bialtu Councillor Pi Judy-i pawhin Theiriat YMA-te’n khualzin tangkhangte eitur an siamsak nan tanpuina a pe a ni.

Theiriat-a leimin hi thenfai tumin ngawrh taka thawh ni mahse ruah sur avangin lei a tlak belh zela, vawiin dar 2:50pm khan lirthei kal theia thenfai a ni.

Kawng a pin lai hian Zirlai naupang exam turte chu theih ang angin kal kai tir an nih bakah damlo damdawi in pan ngaite chu Theiriat YMA-te hian an zawn kai a ni.

Lunglei leh Lawngtlai inkar kawng Bualte daia lei tawlh thin pawh nizan khan nasa taka a tawlh leh avangin lirthei eng chi tan pawh kaltlang theih a ni lo bawka, kawng tlang hun tur sawi theih a ni lo.

Hetihlai hian Lunglei atanga Buarpui lam panna kawng chu Vanhne khaw chhung leh Vanhne leh Thuampui inkarah leimin avangin a ping. Helai kawng pawh hi a tlang hun tur sawi mai theih a la ni lo.

Chanchin buatsaih lai hian Lunglei leh Aizawl inkar leh Lunglei leh Tlabung inkar kawngah te leimin neuh neuh sawi tur awm nual mahse kawng a tlang tha rih.

Tlabung Tuipui erawh ruah sur nasa avang hian a lian chak hle a, chanchin buatsaih lai hian Missionary kaia Tawngtaina In chu tuilian hian a ban a chim thleng tawh a ni.

Tukin zing dar 7:30 vel khan Tlabung Chawnpuiah kawng chhak leiminin Pu Lalduhawma In luahtu awm lo chu a hnawl a, kawng a ping vek. Leiminna hmun hi Tlabung Zodin lam hnaih a ni a, leiminna hmuna awm chhungkaw pali te, Pu Sawmzuala, Pu Lallawmkima, Pu Laithantluanga leh Pu Lalthangpuia te chhungkua chu hmun him lamah insawnchhuah ngai an ni. Leimin avang hian mihring inhliam leh nunna chan an awm lo.

Leiminin kawng a hnawh hi BRN Company hrilh hriat niin, kawng hi lirthei kal thei tura hmalak mek a ni.

Ruah sur nasa avang hian Lunglei khawpui chhungah leimin leh chhiatna tenau sawi tur a awm nual. Vawiin chawhma lam khan Ramtharveng chhung Falkawna Motor silna hmun chu a chhak kopang min chuan a delh chhe veka vanneihthlak takin mihring hliam an awm lo.