
Sawrkar chhanna Nov ni 7, 2023 ral hmain beisei
03 Nov 2023: State Sport Academy, Zobawk-a Football Ground-a hman tur Astro-Turf chungchangah Nov ni 1, 2023 chawhnu khan Zobawk-a Zopui Hall-ah Zobawk Group YMA, Zobawk Joint YMA, Zobawk ‘N’ LC Chairman, Zobawk ‘S’ LC Chairman leh YMA Sub-Hqrs Lunglei te’n Joint Meeting an nei.
State Sport Academy, Zobawk-a Football Ground-a hman tur Astro-Turf chu hmun danga hman atan tiin phurhchhuah niin; phurhchhuah a nih lai hi Zobawk lam mipuite’n an hre mai lova, an hriatchhuah veleh Astro-Turf leh bungraw dang an dahnaah hian kal nghalin, marble chip leh rubber chip phurhchhuah tura an lo tih chu phurhchhuah an remti ta lova, Astro-Turf erawh an dang hman ta lo ni-a tarlan a ni.
State Sport Academy, Zobawk atana hmalakna kal mek, National Green Tribunal Court case a awm avanga chawlh mek (stay) a nih laia Astro-Turf phurhchhuah a ni thut mai chu a hre hmasatu Zobawk mipuite an hrilhhaiin, YMA Sub-Hqrs Lunglei-ah hma lakpui tura an ngen avangin Joint Meeting hi neih a nih thu tarlan a ni.
Astro-Turf hi Aizawl-a RG Stadium leh Futsal Ground hrang hranga hman atan lakchhuah a ni tih leh State Sport Academy, Zobawk chu hna chhunzawm theih a nih veleh Astro-Turf thar hman a nih tur thu hriat chhunzawm a nih thu tarlan a ni bawk.
Joint Meeting chuan State Sport Academy, Zobawk hmalakna chu Court case a awm avanga a chak tawk theih loh zia leh tuna a hmun hma leh building dinhmun te thlirin; he State Sport Academy hi a thuanawpa a zu-zi hlauhna a awm reng avangin Astro-Turf hi a lasawntute’n rawn dahlêt leh se, a ti a. Hmundanga hman ri-ral a lo ni tawh a nih pawhin State Sport Academy, Zobawk-ah hian Astro-Turf tha leh rintlak phah ngei a ni ang tih intiamna lehkha min pe se, tiin, Joint Meeting chuan Sawrkar-ah ngenna siam ni se, an ti a ni.
Hei hi thil harsaa an ngaih loh thu leh Sawrkar lam chhanna Dt 7.11.2023 ral hmaa hriat an inbeisei thu an sawi bawk.