25 Aug 2025: Vawiin khan Government Aizawl College chuan an college kum 50 tlin lawmna, Foundation Day chu an College Campus, Mualpuiah an hmanga, Chief Minister Pu Lalduhawma chuan khuallian niin a hmanpui a. Govt. Aizawl College thawktute, zirlaite, lo thawk tawh leh zir tawh zawng zawngte a lawmpui a, College kal zelna turah duhsakna a hlan a ni.
Zirna sang zawk atana sorkar hmachhawpte sawiin Chief Minister chuan, Mizoram State University din tumin hma kan la a, kum 2036 hmaa lo neih fel hman kan tum a, Administrative Building hi Luangmuala sak kan tum a, a bul lo tantu tur thawktu pawh kan la thuaiin a rinawm, a ti.
Mizoram Engineering College, Lunglei Pukpuia mi saw a taka function-tir kan tum a. Kum 2026 Academic Year atanga zirna tan tumin thawktu thar mi 63 kan la dawn a, a hmunhma thawm that nan tun hnai khan Rs.Nuai 2541.19 kan sanction a ti.
NIT Mizoram Campus hi Lengpuiah kum 2009 khan Forest Clearance nei lo va sak anih avangin kum 2017-ah hna zawng zawng tihtawp a ni a. Rs Vbch 20 chuang chawi tura tih kan ni zui a. Mizoram tana NIT hlutzia kan hriat avangin kan sorkar veleh kan umzui nghal a, Campus sak hna hi chhunzawm theih a ni leh dawn ta a ni, a ti.
Mizoram Polytechnic, Lunglei pawh a ram neitute phalna la lova sak a lo ni a. He harsatna pawh hi chinfel kan duh a, hma kan la mek, a ti. (DIPR)
