12 Oct 2023: Police Public Relation Officer, Mizoram Police, Lunglei thuchhuahin a tarlan danin, Lunglei Police Station chuan tunhnai khan sum hmanga inbumna liantham tak mai 420 IPC hmangin case a register a. Hemi chungchanga a tisualtu Michael Chhakchhuak pawh man tawh niin vawiinah jail-a thawn a ni.
Michael Chhakchhuak hi Aizawla bank lian tak atangin Rs. Nuai sawm mi hming leh document, an phalna la lova hmangin a la nia puh a ni a. Thubuai thehlut tu Pi Lallawmzuali sawi dan chuan September 2023 khan loan lak tumin Lungleia bank dangah a kala, chutah chuan a CIBIL score hniam vangin a loan dina chu reject sak anih thu leh a hminga loan tam tham tak a awm thu an lo hrilh a. Loan chu ama hmingin Michael Chhakchhuakin a lo la tih leh, vawikhatmah a lo rul bawk silo tih a hre ta a ni. Chhui chian lehzualin Pi V.Laldinpuii, Lunglei, tuna Bihar-a cheng mek hming pawhin loan hetiang zat chiah hi Michael-a hian a lo la tih hriat a ni.
Hemi chungchangah hian Lunglei Police chuan theihtawp a chhuaha, Lunglei SP Pu Rahul Alwal chuan, “Lunglei Police te chuan sum hmanga inbumna thil hi kan ngaipawimawhin theihpatawpin hetiang kawnga inhnamhnawih thinte hi chhuichhuaha hrem zel kan tum a ni,” a ti.
Police-te chuan, mipuite hnenah hetiang mi bum chingte lakah theihtawpa fimkhur tur leh kan bank account details te midang hnenah kan pe tur a ni lova, kan hmingin midangin loan an la em tih CIBIL score check-in hriat kan tum thin tur a ni, an ti.
Hriat belh duh tan Lunglei District Police PRO @9612739739 ah hian zawhfiah theih a ni.
