Tennis Court hluia ‘Green Park cum Parking’ siamna tur chu Saikuti Hall chei ṭhat nana ruahman zawk ni se an ti
19 Aug 2025: Vawiin khan Lunglei Municipal Council (LMC) Board of Councillors (BoC) chu an Chairman, Pu Lalzuithanga kaihhruaiin Lunglei Convention Centre-a BoC Meeting Hall-ah an ṭhukhawm a. Nominated member pathum – Health & Family Welfare Minister, Lunglei East bialtu MLA Pi Lalrinpuii; Lunglei High Powered Committee (HPC) Vice Chairman, Lunglei North bialtu MLA Pu V. Malsawmtluanga leh Lunglei South bialtu MLA Pu Lalramliana Papuia te pawh an tel.
BoC ṭhu khawm chuan State Priority Projects (SPP) hnuaia Lunglei Venglaia Tennis Court hlui hmuna ‘Green Park cum Parking’ siamna tura Rs Vbch 5 hu hma lakna tur DPR ruahman chu, a hmun hma leh thil dang chin fel ngai hmabak a la tam deuh avangin leh sum a zuzi (lapse) loh nan, SPP hnuaia hmalakna tur chu Saikuti Hall chei ṭhat nana ruahman zawk ni se tiin lung rual takin an pawm. Green Park leh Parking tur chungchangah chuan khawpui leh mipui tana ṭha tur thlir chungin, a ṭul anga hma lak chhunzawm dan tur leh, SASCI emaw, scheme dang aṭang emawa ruahmanna kalpui theih dan tur ngaihtuah zel ni se, tih a ni.
Chairman report-a a lan danin, State Priority Projects hnuaiah Lunglei khawpui tana pawimawh tur project panga, Rs Vbch 17.50 hu pawmpuina hmuh tawh niin, chung zingah chuan C.Ṭhuamluaia Muala Multi-Level Car Parking sakna tur (Rs vbch 3) a tel.
Vawiina LMC Board of Councillors ṭhut khawmah hian elected councillor 10 bakah, nominated member – MLA 3 an tel a. LMC Chief Executive Officer Pu Donny Lalruatsanga leh Secretary Pi Zoramdini te’n an telpui bawk.
