Thih hnua taksa khawl hrang hrang damlo mamawhte tana petu inziaklut mi 200 chuang
13 Oct 2025: State Organ & Tissue Transplant Organisation (SOTTO) Mizoram hmalaknain, Mizoramah thih hnua taksa khawl hrang hrang damlo mamawhte tana petu inziaklut mi 254 an awm tawh.
Directorate of Hospital & Medical Education hnuaia awm, SOTTO Mizoram chuan, thih hnua taksa khawl hrang hrang leh tissue pek kawngah a buaipui hna an thawk a, National Organ Transplant Programme hnuaia kalpui niin National Organ and Tissue Transplant Organisation (NOTTO) leh Regional Organ and Tissue Transplant Organisation (ROTTO) te nena inthlunzawm an ni.
Mizoram District hrang hrang zingah Aizawl-ah inziaklut tam berin mi 156 inziaklut an awm tawh a, Hnahthial District-ah erawh inziaklut an la awm lo thung. Taksa peng midang tana hman theih tura inziaklut zingah mipa aiin hmeichhia an tam zawk a; kum 30 atanga kum 45 inkar tam berin, kum 18 atanga kum 30 inkarin an dawt a, kum 45 atanga kum 60 inkarin dawt lehin, kum 60 chin chunglam inziaklut an tlem ber a ni.
SOTTO Mizoram hotute chuan, midang tana taksa khawl hlanchhawn pawimawhna leh ṭangkaina lamhawi zirtirna nasa zawka kalpui an tum tih an sawi a, mipuite pawh an thih hnu thlenga midang tana malsawmna leh nunna hial chhan theihna a nih angin nasa zawka inziaklut turin an sawm nghal.
Mizoramah a bul tan nan, Civil Hospital Aizawlah Kal thlak theih tura hmalak mek a ni tih sawiin, India rama Kal natna enkawl lama hmingthang em em Institute of Kidney Diseases and Research Centre, Ahmedabad te nen MoU tih fel tep a nih tawh thu an sawi bawk. (DD)
