Thutlukna siam kawngah Tawngtaia Bible rawn thin turin fuih

22 Jan 2026: Vawiin chawhma dar 11:30 khan High Powered Committee Conference Hall-ah kumin 2026 atana Lunglei District Village Council Committee Meeting hmasaber neih a ni.

He hunah hian Pu V Malsawmtluanga, Vice Chairman HPC, MLA Lunglei North bialtu ni bawk chu thusawi tura sawm a ni.

Pu MST-a chuan Ram leh mipui hmasawn nana sawrkar hmalakna hrang hrangah kalkhawmte chu thawhpui tura sawmin, khawtlang an kaihhruaina kawngah Party mi leh sa thliar lo thei ang bera theihtawp chhuah turin a chah a, mipuite hmasawnna leh an harsatnate ngaihven turin a chah a, khaw hrang hrangah Sawrkar atanga hna lokal leh hnathawhte endik (Monitor) kawngah tan la turin a chah bawk.

VC Member-te chu thutlukna dik siam thin tura chahin, a pawimawh ber Pathian hrereng turin a fuih a, Bible chu tehna diklo theilo a ni a, Thutlukna siam kawngah Tawngtaina neia Bible rawn thin turin a fuih a ni.

Vawiin meeting-ah hian Lunglei District Village Council (LDVA) inkaihhruaina dan ennawn ngaite en nawnin siam that a ni a. Lunglei khaw chhungah Office neih chhunzawm zel nise, Sawrkar leh Dept-te hmalakna chak taka kalpui anih theih nan a tul anga theih tawp chhuahpui nise tiin, Lunglei District chhunga Village Council-te inpumkhatna a awm zel theih nan chak takin hma lak an tum a ni.

Lunglei District Village Council Association Office Bearers :-
President : V Lawmkima (Mualthuam N)
Vice President : Lalbiakngheta (Tawipui ‘N’-I)
Treasurer : Zohmingliana (Vanhne)
General Secretary : Lalsangzuala Chhangte (Haulawng)
Secretary i/e Finance : J Dengkunga (Lungsen-II VCP)
Secretary i/e Information & Publicity : C Lalngaihsaki@Mimi (Thaizawl).