Total Bandh mipuiten an zawm tha

29 Oct 2025: Mizoram hmun dangte ang bawkin Lunglei khawpuiah pawh MNF Party huaihawtin FCAA 2023 duhlohna Total Bandh chu tukin zing dar 6:00 atang khan kalpui niin; chanchin buatsaih lai thleng hian mipuiten an zawm tha hle.

Lunglei khawpui hmun hrang hrangah MNF Sub Hqrs Party Worker-te leh venhimna thawktute duty in, Magistrate lam ten hmun hrang hrang an tlawh kual reng bawka chanchin buatsaih lai hian buaina leh harsatna thleng a awm lo.

Bandh hi mipuiten an zawm tha hle a, sumdawnna hmun leh dawr inhawng a awm loh bakah phalna nei tih loh mihring leh lirthei veivak hmuh tur an awm lo.

Hetihlai hian Civil Hospital OPD chu dan pangngaia inhawngin damlo inentir pawh an thahnem hle a, Civil Hospital Casualty-ah tukin dar 6:00 atanga chanchin buatsaih lai thleng hian Emergency a pantu mi pariat an awm tawh. Lunglei Police Station-ah tukin zing dar 6:00 atanga chanchin buatsaih lai thleng hian thubuai ziahluh emaw FIR theh luh emaw a la awm lo.

Total Bandh kalpui anih avang hian dan leh thupek kenkawh kawngah a tul anga che chhuak thei turin S.P Office Lunglei leh D.C Office Lunglei chu hawn niin, Officer pawimawh leh thawktu dangte a tul anga che chhuak thei turin an inralring reng bawk a ni.