04 Dec 2024: Vawiin khan West Phailenga Lalbuanga Runah Mizo Zirlai Pawl buatsaih Zofest 2024 inkhawm vawi hnihna chu Chief Minister Pu Lalduhoma chuan khuallian niin a hmanpui.
Zofest Souvenir, Zawlbuk a tlangzarh zawhah thu sawiin Chief Minister chuan, Zofate kan tam a ngai a, fa kan ngah deuh deuh a tul, kan ram hi ram dangte nena khaikhin chuan density of population a la hniam a, mihring tam zawk chenna tur ram kan la nei a ni tiin, pun hi kan sawrkar policy a nih avangin nupa, fa pathum leh a aia tam nei chinte hamthatna duan hial kan rilruk a ni, a ti.
Chief Minister chuan, Zofate kan inpumkhat deuh deuh tih kan hmu, mipuite chauh kan inpumkhat lo va, kohhran thlengin kan inpumkhat deuh deuh a ni, tiin Chin Hills-a kan unaute inpumkhata an awm theih nan ka ho ngeiin vawi tam tak kan kan thukhawm tawh a, a umzui tur bik pawl pawh kan dina, chu pawlah chuan MZP President pawh hi a tel a ni, a ti.
CM Pu Lalduhoma chuan, Handholding hmangin khai chhuah tlak thalaite, an bana kaia din chhuahtir kan tum a, dahkham ngai lovin in hmalakna tur loan in la thei dawn a, sawrkar chu in dahkhamah kan tang dawn a, Loan in rulh that chuan a pung pawh kan pe kir dawn che u tiin, he scheme chhawr thei khawp hian lo inbuatsaih sauh sauh rawh u, a ti.
CM chuan, Mizote hi tunah hian khawvela hnam damrei lo ber zinga mi kan nih ka ring tiin, thalai thi kan tam ngah lutuk, a bik takin ruihhlo vanga thihna a tam lutuk, thalaiten ruihhlo hi lo hnar ngam ula, a bawihah lut reng reng suh u, Sawrkar pawhin theihtawp a chhuah dawn a, dan pawh siam that a tum a ni, a ti bawk.
Kumin hi Zofest vawi sawmna a ni a, thupui atan “Hrui khat vuanin” tih chu hman a ni. Nizan khan palaite lawmnain hun an tana, vawiin chawhma lam, an hun hnihna hi Chief Minister chuan a telpui a ni.
Pu Lalthianghlima, MZP President pawhin thusawiin, MZP in Zofest a buatsaih chhan ber chu zo hnahthlak unaute inkara inremna leh inunauna tha tundin a ni a. Manipurah te, Assam ah te, Tripuraah te pawh kan nghat kual a, a hlawkna hi a kum telin kan hmu chho zel niin kan hria, a ti a. Sawrkal kal dan fel tawk lo siam that tuma MZP in hma an lak thinnaah sawrkar thawhpui nuam an tih thu a tarlang bawk.
Inkhawm hi Pu C.Lalremruata, Vice President, MZP in a kaihruai a, Evan. VL Hruaisanga’n hunserh hmangin, Pu Chinkhanmanga Thomte, General Secretary chuan report a pe a ni. Kumin West Phaileng Zofest-ah hian Mizoram chhung leh a thenawm state leh ram tea zo hnahthlak hnam hrang te bakah USA atanga lo tel te an awm a ni.
