Khawvela ram ropui leh thiltithei bera kan ngaih chu United States of America/USA hi an ni a; an ram hruaitu lû ber President te pawh khawvela ram hruaitu ropui ber anga kan ngaih an ni bawk. Chutiang taka ram ngaihsan leh mi chung en, mi tam takin kal kan châk leh kan tawngkamah pawh ‘USA-ah chuan…’ kan tih fo \hina an ram hruaitu lû ber te hian lehkha an chhiar nasa-in, lehkhabu pawh an ziak \hin a ni tih vawiinah hian kan sawi dawn a ni. USA President 33-na Harry S Truman chuan, ‘Lehkha chhiartute zawng zawng hi hruaitu an ni vek lova, hruaitu zawng zawng hi chhiartu an ni’ tiin a lo sawi a nih kha.
John Adams leh Thomas Jefferson
USA President pahnihna John Adams khan lehkhabu 3000 chuang awmna library a nei a; kum 1776-a tih chhuah Adam Smith-a lehkhabu ‘The Wealth of Nations’ a chhiar chuan inrintawkna a pe nasa a. John Adams hian nupui Abigaili hnenah inpuangin, “Pa rem hre lo leh thuhnu dawn thiam lo tak ka ni a, ka lehkhabu te hi ka laka i rochun tur te chu an ni” tiin sum leh pai tam tak hnuchhiah tur a neih loh thu a hrilh. Chutiang bawkin John Adams dawt chiaha USA President pathumna Thomas Jefferson pawh khan lehkhabu 6500 aia tam kha a mimal lehkhabu zêm (library) atan a la khawm a. USA a Library upa ber pawl Library of Congress hi John Adams leh Thomas Jefferson te hmalaknaa din a ni a; he Library-a lehkha chhiarna hmunpui ber hi ‘Thomas Jefferson Building’ tiin a hming an phuah nghe nghe a. Thomas Jefferson hian a mimal lehkhabu 6487 zet he Library-ah hian a thawh hem mai a; ‘Lehkhabu tel loin ka nung thei lo’ a la ti zui!
Abraham Lincoln leh Teddy Roosevelt
Khawvelah hian Abraham Lincoln hre lo hi kan lo awm palh a nih pawhin kan tam hauh lo ang; mi tam takin USA President ropui ber anga an ngaih a ni. Naupang a nih lai atanga lehkha chhiar atchilh niin, an khaw thenawm mel nga biala lehkhabu awm chu chhiar loh a nei lo an ti thin. ‘Ka thil hriat duhte chu lehkhabuah a awm a; ka thian tha ber chu ka chhiar loh lehkhabu min rawn petu tur hi a ni’ tiin a sawi. Chutiang bawkin Teddy Roosevelt chu lehkha chhiar atchilh mi, lehkha chhiar lama pa koham zet mai a ni a. Zan tin lehkhabu pahnih emaw pathum emaw a chhiar thin a, a lehkhabu ngainat zual chu a ziaktu zawngin a inhmelhriat tir thin. ‘Ka thil chhiar zawng zawngah hian ka tel ve vek a ni’ tiin a sawi thin.
John F Kennedy leh Ronald Regan
Khawvel ‘history’ thlak danglamtu, Thlaa mihring lawntirtu leh Neil Amstrong te khawvela hriata phochhuaka Science zirna huanga bung thar min kaipuitu chu John F Kennedy hi a nih kha. Vawiin thlenga film hlawhtling James Bond thawnthu hi John F Kennedy hian a chhiar nasa hle a; Kristian Vanram Kawngzawh te kha ngaihnawm a ti hle bawk. A nupui Jackie Kennedy chuan, ‘A lehkha chhiar dan hi a danglam khawp mai a, kea kal chungin a chhiar a, dawhkanah a chhiar a, chaw ei laiin a chhiar a, zanriah ei zawhah lehkha a chhiar bawk a. Tin, inbual thleng/bathtub-ah a chhiar thin bawk. Lehkhabu chhiarna hun i neih loh i rin zawng zawng angah khan a chhiar vek a, car a khalh lai te hian a chhiar thin’ tiin a pasal chanchin a sawi. Lemchan thiam leh USA President 40-na Ronald Regan pawh hi lehkha chhiar atchilh mi a ni a; Sherlock Holmes pawh ngaihnawm a ti ve hle. American Novelist Tom Clancy lehkhabu ‘Hunt For Red October’ chu Ronald Regan hian tha tih thu a sawi avangin hralh a kal nghal em em a; a ziaktu Tom Clancy pawh hian Ronald Regan vanga a lehkhabu chu hralh hnem a nih thu a sawi fo thin.
Bill Clinton leh George W Bush
Bill Clinton chuan, ‘Mystery (thawnthu phuahchawp, awlsam taka hriatthiam theih loh leh thuruk inthup, tualthahna emaw thil sual dang emaw inthup awmna) hi ka ngaina-in ka atchilh a, hetiang thawnthu hian awlsam takin min tiphur nghal thei a. Chuvangin hetiang lam hawi lehkhabu hi chu ka chhiar reng zel’ tiin a sawi. Tin, George W Bush, lehkha a chhiar ngai dawn em ni tih tur khawpa pa rorum pawh khan lehkha bu a ngaina hle a. Kum 2006-2008 inkarah khan lehkhabu 186 a chhiar chhuak a ni. ‘He hna (president) i hmachhawn theihna tura puitu tha tak tak duhthlan tur a awm a, chung zinga pakhat chu lehkhabu hi a ni’ tiin a sawi.
Barack Obama leh Joe Biden
Mihang zinga USA President hmasa ber leh a awmchhun la ni Barack Obama chuan, ‘Naupang tupawh library-a kan luhtir lai hian, an nun chu chatuan atan a tha zawngin kan thlak danglam a ni. Thil tha tihna tur chakna nasatak nei turin kan buatsaih a ni’ tiin a sawi a. New York Times sawi dan chuan Obama hian President a nih chhungin zan tin deuh thaw hi lehkhabu a chhiar a, an nupa-in White House-ah lehkhachhiarna hun ‘Let’s Move! Let’s Read!’ tih chu buatsaihin zirlai naupangte nena lehkhachhiarna hun an huaihawt a ni. Tuna USA President 46-na ni mek Joe Biden pawh hi lehkha chhiar thin mai ni lo-in lehkha ziaktu a ni tel bawk a. ‘Promise Me, Dad: A Year of Hope, Hardship and Purpose’ (2017) leh ‘Promises to Keep: On Life and Politics’ (2007) tih lehkhabu a tichhuak tawh a; James Joyce lehkhabu ‘Ulysses’ tih chu a ngaina hle bawk.
Heng kan tarlan baka USA President te hian lehkha an chhiar nasa em em a; khawvela ram ropui ber hruaitu ni chunga lehkha an chhiar nasa hi an entawn tlak hle. Kan ram hruaitute hian lehkhabu hi an chhiar ve ngai em le? Kohhran chanchinbu, nitin chanchinbu leh lehkabu chhiar ngai lo kan nih chuan inenfiah hle kan ngai tihna ni.
Mi ram hmasawnzia te, mi ram changkanzia te kan sawi a, kan awt thin. Chumi ni tura an kalkawng zawh te hi keini pawhin kan zawh ve theih reng a ni a; chung zinga pakhat chu lehkhachhiar tam a ni.
