Kan thupui hi “Tawngkam tha-in Sial a man” tih a ni a. He tawng upa hi Mizote zingah tawngkam tlânglâwn tak leh lam zin pawl tak pawh a ni àwm e. Mahse, thangtharte’n kan hriat dan tlangpui leh tunlaia kan hman thin dan satliah ang ngawt hi a ni lo deuh maithei a nia. A lo chhuahna bul leh a chinchhuakin kan sawi dawn a. He tawngkam kaihhnawihah hian thil tam tak hriat belh tur kan neih ka beisei a. He thu behchhan hian thangtharte’n hria se ka tih em em thin thil nihphung sawizauna hun ka nei tur hi ka lawm hle bawk a ni. Chuvangin, chhiartute’n ngun tak leh chik taka min lo chhiarsak turin ka ngen hmasa che u a ni e.
Mizo te’n Sial an vulh tanna hi a rei thawkhat hle ang tih a rin theihna chu kan thawnthu hlui tam takah te a lang hlawm a. Liandova te unau thawnthu-ah pawh kan hmu a. Tin, Sibuta’n a farnu Darlalpuii chu Sial ai-ah a chhun tih te pawh kan hria a ni.
Awle, a hmasa-in hmanlai Mizote khawtlang nun leh sakhua-a Sial dinhmun pawimawh dan kan sawi phawt ang. Kan pi-pu te khan ‘Sa’ leh ‘Khua’ an be thin a. Sa chu Vawk-in an bia a, khua chu Sial-in an be thin. Tichuan, sa leh khua chu sawi kawpin ‘sakhua’ an ti thin a ni. Chu chu vawiin thlenga kan hman tak zel dan pawh a ni. Kût nî vangthla-ah te Sial an chelek hle tih kan hria a. Sial meuh talha vantlang hrai thinte chu mi ropui leh zah kai nihna a ni. An thlarau pialral kai nana tih tur rahbi hrang hrang an chheh chhohah pawh Sial hian kawngro a su em em a. Chung rahbi te an hlen kimna leh a tlângkawm nan pawh Sial an chhung a, Khuang an châwi thin a ni.
Tin, Mizote’n tangka an hman ve hma chuan hausakna an tehna ber chu Sial hi a ni a, Sial ngah leh buh ngah te kha mihausa an ni mai. Hmeichhe man pawh Sial-in an teh a, ‘a siala sial’ zâwngin an sawi bawk thin. Sailo lal nula te ngat phei chuan Sial 10 / Se sawm te an man a, hnamchawm nula te’n Se li / Se nga te an man bawk thin. Tin, miin sâwn a thlak a, a sâwn thlakna nula kha a neih leh duh si loh chuan Sepui a châwi thin a. Chu chu ‘sâwn man’ ti pawhin an sawi bawk thin. Tin, mi nu thlim leh lawithlem te, nula zen leh pawngsual te pawh Sial chawina tling a ni. Thubuai-Hlabuai neih nikhuaa an lei inchawitir thin sâng ber chu Sial hi a ni a, chu aia sâng a awm thei tawh lo. Tichuan, Sial meuh chawi theihna khawp chu thu tling fe, thu liantham chin a ni tih kan hre ta a. Chu chu ka han sawi kual deuh viauna chhan pawh a ni.
Tunlaia Sepui man leh Sechal man te han chhût ila, cheng nuai chuang pawh a ni hial àwm e. Mahse, hmanlai khawsak leh khawtlang boruakah chuan tunlaia tangka inchawitir ringawt aiin Sial meuh han chawi chu a rit zawkin a hmingchhiatthlak zawk fe a, a zahthlak zawk hle ang tih chu kan hriatthiampui tur a ni ang. Tichuan le, kan thupui kha tihian a lo fiah thei tawh ang : “Miin, thil pawi liantham, Sial chawi theihna khawp hial pawh lo khawih ta sela, inphahhnuai tak leh tawngkam thuhnuai-rawlh taka ngaihdam a dil chuan Sial chawi ngei ngei tur khan a chawi loh phah thei a ni” tihna a ni a. Chu chu “tawngkam tha-in Sial a man” an lo tihna chhan chu a ni.
Tunlai thangthar tam tak hian, “Tawngkam tha taka mi kan biak chuan Sial min pe mai ang” emaw “thil hlu tak min pe ang” ti ang deuh zâwngin an sawi fo thin a. Zirtirtu thenkhat leh zirlaibua mi hrilhfiahtu thenkhat pawhin chuti lam hawi deuh chuan an ngai ta deuh fo mai a, a dik lova, a pawi hle a ni. Tin, ‘tawngkam tha’ han tihah pawh hian tawngkam thiam viau leh tawngkam thlum khamphei duai satliah ringawt hi a tum a ni lova, inchhirna leh thuhnuairawlh tawngkam sawina a ni. Vawiin thleng hian he tawng upa leh he thufing hi a la dik zel a. Pawi lian tak inkhawihsak chungchangah pawh tihtakzet leh thuhnuairawlh taka ngaihdam dilna avang hian cheng sang tam tak leh sing tam tak chawina turah pawh miin ngaihdamna an la chang fo thin a ni.
Chu ai pawha la ril zawk mah chu inhmelmak kumkhua tawh tur ang hiala thuchhia kan neih chang pawhin tawngkam tha leh thuhnuairawlhna avangin kan inhmu thiam leh a. Thenkhat phei chu a hma ai maha boruak tha zawkin kan awm zawk hlauh thei thin a nih hi. Tawngkam tha hian Sial zawng a lo man tehmeuh mai le.
Awle, tunah chuan tunlai khawvel mil zâwngin kan her tawh ang a. A tir lama kan sawi tak ang tak tak kha chu thil awm khât tak te pawh an ni thei a. Thil liantham em em pawh ni lem lo, tawngkam tha leh thalo te, tawngkam mawi leh mawilo te inkar danglam zia te kan sawi dawn a ni. Vawiin thleng hian tawngkam tha hian nasa takin kawngro a la su zel a, kumkhua-in a su zel dawn pawh niin a lang. Chutih laiin thangthar zingah hian tawngkam hawihhâwmlo leh châltlâi deuh taka mi chhawn thin kan tam telh telh ni hian a lang a. A bik takin, aia upa te biakna tawngkamah thalai leh naupang te’n zir tur kan ngah hle mai.
A thuhrimin, hnam fing leh hnam hlun zawkte hi chuan khawlai leh bazar tawngkam deuh bik te, thenrual inkawmna tawngkam deuh bik te, inchhungkhura hman chi deuh te, upate lakah leh hotute laka hman deuh bik tawngkam te, sakhaw lam tawngkam bik te an nei thin a. Keini zawng, hnam naupang leh changkanglo tih takah eng hunah pawh, khawi hmunah pawh tawngkam inang vek kan hmang mar pût mai a. Thiante nena kan inkawm hlimna tawngkam kha aia upate leh milian zawk te, hotute lakah pawh kan hmang zui zel a. Chu chu kan hriat mang loh kârah tawngkam hawihhâwmlo a lo chang ta mai thin a ni. Kan hotute leh kan pi kan pu te laka thuhnuairawlh tawngkam hmanna tur hliah hliahah te pawh thian biakin kan bia a, thenrual pawl hlimna tawngkam pangngaiin kan bia a. Chu chu a fel lo fo thin a, mi hawihhâwmlo kan lo ni ta mai thin a ni.
Workshop lian pui pui neitute, motor tam tak neitute, contractor lian tam tak te hian Mizo aia hnamdang chhawr nuam an tih zawk fona chhan pawh kan sawi tak thilte avang kha a ni. In luahtu atan pawh hnamdang an duh zawk fo te, officer tam takin driver leh thuihhruai atana hnamdang an duh zawk fo te pawh hi chu tho chu a ni. Mihausa tak pakhat, motor tam tak nei leh hnathawh tur tam tak nei reng thin hian hnamdang deuh hlir a chhawr thin a. Vawikhat chu a chhan ka zawt ta a. Ani chuan, “Mahni hnampui ngei te hi chhawr chu ka duh alawm, mahse, an hawihhâwm lova, mi zah dan an thiam lova, min level biak tawp mai a. Hnamdangte angin min zah ve lo a ni,” a ti a; a dik khawpin ka ring. Helai thu-a ka han lak bik duh deuh chu, ‘min level biak tawp mai’ tih lai hi a ni. Chu chuan tawngkam tha leh hawihhâwm hlutzia a tarlang chiang hlein ka hria.
Tin, mite’n mifel an tih thin leh kawm nuam an tih thin te, an ngainat zâwngte hi tawngkam tha hmang mi an ni zel a. A hranpa-in mi huatthu sawi lem lo mah ila, kan tawngkam hawihhawm loh thin avang hian midangte tan kan ngainatawm lo fo thin a, kawm nuam min ti lo thin a, kan bula titi khawchang sawi te an châk loh phah thin a ni. Inchhungkhurah leh nupa kârah te pawh inlungrualna leh inngainattawnna awm tur chuan tawngkam tha hi a pawimawh a. Thian leh thian inkârah te, mipui vantlang zingah te leh hna thawhhona tinrengah te, a bik takin tisa lama upate leh hotute leh thuneitute lakah te tawngkam tha leh hawihhâwm hman tum hram hram thin ila; a zir pawh i zir thin ang u. Chu chu mi changkang leh mifel nihna a ni si a. Tunlai mite hian miin an biak laia lehlam hawia chhan emaw, kal chunga ngaihsak lo fahrana aia upate chhan liam mai mai te an ching viau mai a. Hei hi a mawi lova, mi mawl tak te tihdan a ni ngai e.
Awle, tawngkam tha chuan Sial a man thu kan sawi tawh a. Tunlai atan chuan Sial chang a man lova; mite ngainat hlawhna te, mifel nihna leh mi zah phurhna te, hlutna tinreng a keng tel vek a ni tih hi hre thar leh ila. A bik takin, hotute leh aia upate lakah phei chuan tawngkam tha leh hawihhâwm hman hram hram i tum theuh ang u.
