“3rd phase tur kan thlang leh anga kan Sawrkar leh veleh kan sem chhunzawm nghal dawn” – Dr.K.Pachhunga MLA
Nimin khan Tawipui South Hall-ah SEDP 2nd phase Launching programme hman a ni a, Lunglei South bialtu MLA Dr.K.Pachhunga chu khuallian niin programme a hmanpui. Chairman Pu C.Lalthanzama VCP Tawipui niin, Rev.Hmangaihvulluaia’n Hunserh a hmang.
Dr.K.Pachhunga chuan, SEDP 2nd phase dawngtu zawng zawngte dik tak leh tha taka Sawrkarin a tum ang ngeia hmang turin a chah a. Mithenkhatin SEDP hi sawichhe thin mahse mirethei, kuthnathawk bultanna neilote tan malsawm anih zia leh a tangkai zia MNF Sawrkar hian a hria a, sum harsa chung chung pawhin kan sem zel dawn a, Pathian leh mipui zarah kan sawrkar leh anga kan intiamna ang ngeiin Rs Nuai 3 hi kan sem hrim hrim dawn, a ti.
Miretheite hi keini chuan kan hlam chhiah dawn lo va, taima taka hnathawk tura infuiha bultanna Sum pek tum chuanglo hi eng kalphung thar mah a ni lo. Tun kan Sawrkar chhung hian 3rd phase tur kan thlang leh anga kan Sawrkar leh veleh kan sem chhunzawm nghal dawn a ni, a ti bawk.
Hmabak kan neihte hi tihlawhtlinga hmasawnna hna thawk tak tak turin MNF Party Sawrkar tir leh ngei a tul a, Lunglei South bialah ngei pawh MNF Candidate thlang tling leh turin rilru lo siam turin ka chah duh che u a ni, a ti.
SEDP 2nd phase Launching programme-ah hian SEDP Line Dept hrang hrang- Vety, Horti, Agri, Industry te atangin Beneficiary chhungkaw 324 ten APR Sign-in an Account-ah pawisa thunsak an ni dawn a ni. SEDP APR Sign tute hi Thualthu,Tawipui N-1&2, Tawipui South, Mualthuam South leh Mualcheng South khuate an ni.
He hunah hian Pu PC.Lalramnghaka (Sena) President Lunglei South North Block-in lawmthu sawiin, bialtu MLA hi MNF Sub Hqrs hruaitute leh Unit hruaitute’n an tawiawm a ni.
