Lunglei; 14 October 2023: Nimin khan Lunglei District Bawrhsap leh District Election Officer ni bawk Pi Ramdinliani IAS leh Lunglei SP Pu Rahul Alwal IPS te’n DC Conference Hall-ah a rualin MLA Inthlanna lo awm tur chungchanga hriattur hrang hrang inhrilhhriatna hun (Joint Press Briefing), Lunglei-a thuthar thehdarhtute an neihpui.
Nimin Joint Press Briefing kaihruaitu Bawrhsap Pi Ramdinliani chuan Mizoram Inthlanpui puan nî, Oct ni 9, 2023 atang khan Election Model Code of Conduct hman tan a nih thu a sawi a. Work Order tihchhuah phal a nih loh thu te, hna la tan loh te khawih phal a nih loh thu leh hna kal lai erawh a kal zel theih thu a sawi a. Sawrkar building leh compound-ah te political party emaw mimal fakmawina tar phal a nih loh thu te, mimal compound-ah te pawh a neitu phalna lo chuan tar phal a nih loh thu leh vantlang inkhawm neih dawnin a hma ni hnih (darkar 48) la awmah dil a ngaih thu a sawiin; hengte hi political party, candidate, agent te leh mipuite’n zawm turin a ngen a ni.
Lunglei Bawrhsap chuan candidate pakhatin Rs nuai 28 bak pawisa hman phal a nih loh thu a sawi a. Income Tax Investigation Team an lokal dawn thu leh candidate leh an chhungte account chevel vil anih dawn thu leh bank lam pawh hriattir an nih tawh thu a sawi bawk.
Pi Ramdinliani chuan Oct ni 13 atanga Oct ni 20, 2023 thleng Nomination file theih a nih thu a sawi a. Tun tum inthlanpui-ah hian senior citizen kum 80 chin leh pianphunga rualbanlo-te tan mahni In atanga vote thlak theihna buatsaih a nih dawn thu leh Lunglei Dist bikah chuan senior citizen vote thlakna hmuna vote thlakte hnenah ngaihhlutna Certificate pek a nih dawn thu a sawi a. Hmeichhe pual Pink Polling Station sawm leh pahnih (12) siam tum a nih thu a sawi bawk.
Lunglei Bawrhsap chuan Observer pali an awm dawn thu a sawi a; chungte chu– General Observer (inthlanna endiktu) – IAS Officer, Expenditure Observer – IRS Officer, Police Observer (security) leh Special Observer te an ni ang.
Bawrhsap chuan inthlanna felfai leh muanawm a awm theih nan thuthar thehdarhtute chu an pawimawh thu a sawi a; mipui sûkthlêk tihdanglam theitu an nih avangin lai taka an thuziakte kalpui thin tura chahin, tun tum MLA Inthlanna kan hmachhawn tura mipui hriattur pawimawh hrang hrang Sawrkarin thuchhuah a siam thin te chu a tul ang thehdarhpui turin a ngen hlawm bawk a ni.
Lunglei SP Pu Rahul Alwal pawhin MLA Inthlanpui lo awm tura venhimna chungchanga an inpuahchah dan kimchang report a pe a. Anti Drugs & Anti Liquor Campaign neih chhoh niin, dàn bawhchhia mihring leh ruihhlo engemawzat man a nih tawh thu a sawi. Lunglei Dist-a inthlanna felfai leh muanawm a awm theih nana a tha thei ber tura an inpuahchah thu tarlangin; CRPF company 7 dil a nih thu leh inthlanna felfai leh muanawm nei tur tithuanawp zâwnga che an awm chuan rang taka action lak zel a nih tur thu leh Police pawh duty ngaihthah an awm chuan rang taka an chunga hremna chelek a nih tur thu a tarlang.
MJA President Pu Laltlanthanga pawhin thu sawiin,MLA Election felfai leh muanawm tak kan nei theih nana DC leh SP Office-te inpuahchah dan leh an thawhrimna an hriatpui thu leh lawmawm an tih thu a sawi a. Theihtawp chhuaha an tawiawm zel tur thu DC leh SP te chu a hrilh a ni.
Tunah hian MLA Election-a subject hrang hrang buaipuitu tur Nodal Officer 17 ruatfel vek tawh an ni a. Sector Officer te, Assistant Expenditure Observer te, Video Surveillance Team te, Video Viewing Team te, Static Surveillance Team te, Complaint Monitoring & Control Room, Flying Squad te leh Media Monitoring & Certification Committee, Media Centre, Liaison Officer to Observers te, etc. te pawh din/ruatfel vek tawh niin; an mawhphurhna theuh bawhzuiin hna an thawh mek tawh thu nimin briefing-ah hian tarlan a ni bawk.
Nimin Joint Press Briefing-ah hian DC leh SP te hi Lunglei Addl DC (P) Pu Liansangzuala Chhakchhuak, Lunglei Addl DC (E) Pu Donny Lalruatsanga, Addl DC(E), Lunglei Addl SP Pu Beihmotaosa leh Lunglei DIPRO Pu N.Vabeiratlua te’n an tawiawm a ni.
