Tun inthlan lo awm tur chu Kristiante hmakhua lo awm zel tur inthlanna anga ngaih theih a ni, an ti
Lunglei; 4th Nov. 2023: Vawiin khan Lunglei District Congress Committee (LDCC) hruaitute chuan President Office Chamber-ah thuthar thehdarhtute an kawm.
He hunah hian LDCC hruaitute chuan inthlanpui lo thleng mai turah inthlanna felfai leh muanawm kan neih theihna tura thawktu Official zawng zawngte leh mipuite zirtirna petu Media-te chungah lawmthu an sawi.
LDCC hruaitute chuan tun inthlan lo awm tur chu kum dang inthlan aiin a danglam hle tih sawiin, Party thenkhatten lalna leh thuneihna duh vangin sum leh pai nen nasa takin tan an la a, hetihlai hian Kristiante hmakhua lo awm zel tur inthlanna anga ngaih theih anih avangin BJP leh a thawhpui theih tur ang chi chu mipuiten kan Vote loh a him a ni, an ti.
LDCC hruaitute chuan Congress a sawrkar chuan Lunglei Bypass Road leh Lunglei chhuah lamah Lunglei khawpui zauhna tur kawngpui siam an tum tih sawiin, Lunglei khawpuiin tui intur hnianghnar zawk a neih theihna tur leh thalai lehkha zir mekte leh infiamna lama tuimi te tan an tum ram an thlen ngei theih nan ruahmanna tha tak siam a ni tih an sawi.
Lunglei North bialtu ni mek Dr.Vanltanpuia hnathawh puitlin thenkhat Vote zawn nana thehdarh zingah Congress Sawrkar bultan engemawzat tarlan a ni chu thudik chanve pawh nilo dawt chiang bal anih avangin mipuite inzahlohna lian tak nia an hriat thu LDCC hruaitute hian an sawi.
Chanchinbumi te zawhna chhangin Lunglei District chhung bial parukah Congress dinhmun chu tunhnai hian nasa takin a thang tih sawi bawkin West Tuipui leh Thorang bakah a dang bial pali-ah pawh beiseina an nei sang hle tih LDCC hruaitute hian an sawi a ni.
LDCC hruaitute chuan inthlan lo awm turah Vote nei zawng zawngten rilru fim takin vote thlak sela an duh thu sawiin, ram hruaitu atan chuan mi dik leh rinawm sum enkawl thiam kan mamawh ber tiin, chutiang mi chu Congress chuan Chief Ministerial Candidate Pu Lalsawta kan nei a ni, an ti.
