15 Nov 2023: Tukin dar 4:00 vela Vaphai khaw chhak zawn Tuibual khua a Myanmar camp chu Chin National Defence Force (CNDF)-te’n an lak tak avangin hemi camp a awm Myanmar sipai 29 chu Mizoram lamah an rawn chhuk.
Tuipuiral YMA Group President Pu T. Lalramenga’n Akashvani Aizawl a hrilh danin CNDF mite hian nizan hmasa zanlai vel atang khan Tuibual Myanmar sipai bahrik hi an kap tan a. An tang thei reng dawn lo tih hria-in Myanmar sipaite hian camp hi rauhsanin Mizoram an pan a, Assam Rifles kuta inhumhim an tum niin an sawi a. Dungtlang Police Station atanga Mizoram Police kalte chuan Saikhumphai bul Tiau lui-ah lo dawngsawnga Assam Rifles kuta pek tura ruahmanna siam a ni. Vaphai Branch YMA Vice President leh Vaphaia Raltlan Committee Vice Chairman Pu Zadingpuia hnen atanga Champhai a kan Corr Lalhlupuia’n thu dawn danin CNDF-te chuan Tiau lui chhak, Tuibual khuaa Myanmar Sipai camp hi an la fel tawh a, he hmuna in awmte pawh CNDF te’n an hal sak nghal vek a ni. Myanmar sipai 29 rawn tlan thlate hi Police leh Assam Rifles bakah Vaphai VC leh YMA hruaitute chu lo dawngsawng turin Saikhumphai-ah an lo awm a ni.
He inkahna avang hian Tuibual bul, Leilet khaw mipuite pawh sahimna zawngin, chhungkaw 63 (mi 600 vel) Vaphai Saikhum-phaiah an rawn lut tawh bawk a, Khaw thenawm atang pawhin raltlan hi rawn awm belh zel turah an ngaih thu Vaphai khawtlang hruaitute chuan an sawi a ni.
Pathianni thimhlim atanga Kachin Independent Army (KIA), Chin National Army (CNA) leh Chin Defence Force (CDF) tangrualte’n Champhai district a Zokhawthar chhak mai Khawmawi leh Rihkhawdar a Myanmar sipai camp lak tuma beiin zankhua leh a tuk nileng deuhthaw an inkah hnu-ah camp pahnih hi lak a ni a. Khawmawi camp atanga sipai tlanchhia mi 42-te hi Mizoramah lo lutin Zokhawthar Police-in Ministry of Home Affairs thu angin Assam Rifles kutah an hlan a. Champhai lamah hruaiin Hnahlan thlenpui an ni a. Hnahlan atang hian Indian Air Force helicopter-in Mizoram atanga phurhchhuah an ni.
Thu dawn danin Myanmar Chin state a Mizoram hnaih lamah tunah chuan Myanmar sipai camp a awm tawh lova, mipui tangrual sipai invuahte’n an la fai vek tawh a ni. [AIR Aizawl]
