15 Nov 2023: Mara rama Sap Missionary dam awm chhun leh hnuhnung ber Rev.Violet Louise Anne Mark (Pi Vaili) kum 85, tunkar Thawhtanni zing dar 8:10-a a chenna In Saikao (Serkawr) a boral chu vawiin tlai khan Saikao a, missionary thlanah vui a ni.
Pi Violet-i thlahna leh vuina inkhawm hi Saikao Mission compound kawtah chhawng hniha buatsaih niin Rev. Z.Hrohmo Executive Secretary CCI (M)-in a kaihruai a. Thlahna thuchah kohhran hrang hrang leh pawl hrang hrangte’n sawiin pangpar hlanna hun an hmang a. Siaha khawpui leh khualkhua atanga thalai rual za tam takin Halleluiah Chorus an rem bawk.
Chawhnu lamah vuina hun hman niin ECM Assembly Moderator Rev. Phosa Chozah-in a vui a. Heti hian Mara rama chanchintha meichher lo chhitu Rev. R.A.Lorrain te thlah, an tunu la dam awmchhun Pi Violet Louise Anne Mark (Pi Vaili) chu an rawngbawlna hmun ngei Mara ramah a lu phum ve in Rev. R.A.Lorrain thlah Mara rama luphum zinga a panga na a ni a. Pu Vaili hian a pasal Rev. L.Mark leh a fate 4 leh a tu engemawzat a kalsan a ni.
ECM kohhran chuan Saikao a Pu Vaili thlahna tel ve theilo te tan Kohhran tinah chhun dar 12:00 khan mahni Biakin theuhah a sunna programe an hmang vek bawk a, CCIM leh kohhran dangte pawh Pi Vaili sunna hmang an awm bawk a ni.
Nimin khan Siaha a dawrkai leh chawhmeh zuar Association te pawhin Pi Vaili sun nan an dawr te an khar a. Pi Violet-i vuina Saikao a neihah hian Siaha khawpui leh khaw hrang hrang atangin mi sang tel an pungkhawm a. Mipui sang tam tak kalkhawm mikhual an nih avangin khaw hrang hrang kohhran hmingin thilpek ei leh in tur an thawh nasa hle a, sial leh vawk pawh an thawhkhawm nasa hle a ni.
Rev. Violet Annie Mark hi Rev. AB. Foxall leh Pi Louise Marquerite Tlôsai Lorrain te fanu neihchhun a ni a, Mara ram leilung Saikao khuaah kum 1938 April ni 16 ah a lo piang a, Kum 1968 December ni 11 ah Mara tlangval Rev. L.Mark, Saikao nen inneiin Rev. A. B. Lorrain Foxall an kut a suih a ni. Pi Vaili hian thil tam tak a nun leh thiltihah hnuchhiah neiin a duh ber chu ECM leh CCIM kohhran inpumkhatna a ni a, hei hi a ruang chungah pawh sawi uar ber a ni. (AIR Aizawl)
